Janë rreth 900 forca policie që kanë blinduar Shkodrën, në pritje të ndeshjes së Kombëtares shqiptare me Maqedoninë. Monitorime dhe gatishmëri ka në çdo rrugicë, ndërsa tifozët mbeten në dorë të Zotit, pasi parashikimet e motit flasin që do të ketë reshje shiu. Por pavarësisht kësaj, në stadiumin e hapur të sapo përfunduar “Loro Boriçi” ashtu siç është edhe rregulli nuk janë lejuar çadrat por as mjete të tjera mbrojtëse.
Stadiumi i hapur dhe moslejimi i çadrave të kujton ndeshjen me Serbinë në “Elbasan Arena”, ku tifozët qëndruan në qiell të hapur për 90 minuta dhe u bënë qull nga shiu. Rrugët kryesore përreth stadiumit janë bllokuar dhe nuk lejohet qarkullimi. Mijëra tifozë janë gati për ndeshjen mes Shqipërisë dhe Maqedonisë teksa kanë zbritur në rrugët e Shkodrës duke gjallëruar qytetin. Ata janë mbledhur para hotelit ku po qëndrojnë futbollistë, në pritje të daljes së tyre. Biletat janë shitur të gjithë pasi edhe qindra tifozë shqiptarë të Maqedonisë kanë ardhur për të bërë tifo për kuqezinjtë.
POLICIA
Policia e Shkodrës ka publikuar planin e masave të sigurisë që do të ndërmarrë për të siguruar mbarëvajtjen e ndeshja ndërkombëtare e futbollit, ndërmjet përfaqësueses së Shqipërisë dhe Maqedonisë, ndeshje e cila do të luhet në stadiumin “Loro Boriçi”, sot në orën 20:45.
Në kuadër të këtyre masave të parashikuara, policia iu bën me dije qytetarëve të qytetit Shkodër dhe tifozerisë vendase dhe të huaj, ardhur nga Kosova, Mali i Zi dhe Maqedonia dhe treva të tjera Shqipëtare, që do të ndjekin ndeshjen në stadiumin “Loro Boriçi” se, DVP Shkodër, për mbarëvajtjen normale të aktivitetit sportiv, do të marrë disa masa kufizuese mbi lëvizjen dhe parkimin e automjeteve në afërsi të stadiumit dhe në akset rrugore që lidhen me të, si më poshtë vijon:
1. Në rrugën “Bujar Bishanaku”, (ose rruga e gjerë e Kirasit), duke filluar nga ora 08:00 do të ketë ndalim të qarkullimit rrugor dhe ndalim të parkimit të automjeteve në të dy kahet e rrugës, deri në orën 24:00
Marrja e këtyre masave bëhet për arsye se kjo rrugë do të jetë e vetmja rrugë kryesore e hyrje-daljes së tifozëve vendas dhe të huaj
2.Në aksin bulevardi “Zogu i Parë” (ose sheshi Parrucë deri tek “Ish 5-Heronjtë”), duke filluar nga ora 08:00 do të ketë kufizim të qarkullimit dhe ndalim parkimi të automjeteve në të dy kahet e rrugës, deri në orën 24:00
3.Do të ndalohet parkimi i automjeteve dhe lëvizja e tyre nga degëzimet e rrugës që të çojnë në rrugën “B. Bishanaku” dhe anasjelltas, nga ora 08:00 deri në ora 24:00
4.Do të ndalohet parkimi dhe lëvizja e automjeteve në rrugën “Zyhdi Repishti” (rruga e ish poligonit të qitjes) nga ora 08:00 deri në orën 24:00
5.Do të ndalohet parkimi i automjeteve, në të dy anët e Unazës Perëndimore (nga ish Zukthat deri tek Kryqëzimi i Kirasit) nga ora 08:00 deri në orën 24:00
Do të ketë kufizim lëvizjeje të automjeteve në orët e pasdites deri në përfundim të ndeshjes në segmentet rrugore: “Xhabije – Parrucë”, “Sheshi 2 Prilli – Parrucë”, “Kryqëzimi i ish degës – Ish 5-Heronjtë”, “Kryqëzimi i Rusit – Ish 5-Heronjtë”.
Aktiviteti sportiv është parashikuar të fillojë në orën 20:45 dhe hyrja e tifozerisë, me qëllim shmangien e konfuzionit, do të nisë në orën 17:00
“Kërkojmë mirëkuptimin e sportdashësve që do të marrin pjesë në këtë aktivitet në respektimin dhe zbatimin e këtyre masave si dhe pajisjen me biletë dhe dokument identifikimi, duke shmangur njëkohësisht mbajtjen me vete dhe futjen në ambientet e stadiumit të, sendeve të forta, borive, shisheve të çfarëdolloj, fishekzjarrëve, monedhave apo sendeve metalike, pasi në hyrje do të kontrollohen fizikisht të gjithë.
Njoftojmë administratorët e bizneseve që zhvillojnë aktivitet tregtar përreth dhe në afërsi të stadiumit “Loro Boriçi” të tregohen mirëkuptues duke i mbyllur aktivitetet në orën 15:00
Drejtoria Vendore e Policisë Shkodër, kërkon mirëkuptimin komunitetit shkodran dhe drejtuesve të automjeteve, të shmangin zonën ku zhvillohet aktiviteti sportiv duke përdorur akse dhe drejtime të tjera lëvizjeje pasi, do të vlerësohej si një ndihmë mjaft e çmuar në mbarëvajtjen e dhe garantimin e masave të sigurisë”, bën me dije policia.
ma.me
