Pas arrestimit në Mal të Zi të Viktor Markut, personi që dyshohet se qëlloi me silenciator Hekuran Billën te Komunia e Parisit, për të marrë hakun e vëllait të vrarë Prelë Marku, zbardhen të tjera detaje për ngjarjen.
“Mësohet se policia ka prova të sigurta që Viktor Prela dhe nipi i tij Sebastiano Mali e kanë ndjekur Hekuran Billën që ditën kur hyri në Shqipëri nga pika kufitare e Malit të Zi, deri mbrëmjen e 11 qershorit kur edhe ndodhi ekzekutimi”, shkruan Balkanweb.
Policia ka sekustruar 80 kamera në të gjithë vendin, aty ku kishin qënë lëvizjet e fundit të Billës për të dalë në konkluzionin se si Viktor Prela ashtu edhe nipi i tij Sebastiano kishin marrë makina me qira për të gjurmuar lëvizjet e Billës, deri në finalizimin e krimit.
Në 11 qershor, sic edhe deklaruan familjarët e viktimës, Hekuran Billa e kaloi pjesën më të madhe të ditës në portin e Durrësit ku u mor me zhdoganimin e mjeteve, ndërsa nga pamje filmike që disponon policia, makina Hekuran Billës, një BMW X6 gjurmohej nga makinat e Viktorit e Sebastianos.
Policia verifikoi gjithashtu se këto makina i kishin marrë me qira të afërm të Sebastiano Malit.
Viktor Marku qëndronte në mënyrë të parregullt në Mal të Zi teksa është lokalizuar dhe është kapur nga Policia malazeze me kërkesë të Policisë shqiptare dhe është dorëzuar në Pikën Kufitare të Hanit të Hotit.
NJOFTIMI NGA POLICIA
Policia e Shtetit
Arrestohet autori kryesor i dyshuar për vrasjen e shtetasit H. B.
Falë shkëmbimit të informacioneve dhe bashkëpunimit efikas me Policinë malazeze u bë i mundur lokalizimi, kapja dhe arrestimi i shtetasit V. M.
Strukturat e Policisë së Shtetit kanë vënë në pranga, në Pikën e Kalimit Kufitar Hani i Hotit Shkodër, shtetasin V. M., pasi dyshohet se është autori kryesor i ngjarjes së ndodhur mbrëmjen e 11 qershorit, te Komuna e Parisit, Tiranë, ku mbeti i vrarë me armë zjarri shtetasi H. B.
Shtetasi V. M. qëndronte në mënyrë të parregullt në Malin e Zi dhe falë shkëmbimit të informacioneve mes Policisë së Shtetit dhe Policisë Malazeze, u bë i mundur lokalizimi dhe kapja e shtetasit V. M., në Malin e Zi.
Policia malazeze ia ka dorëzuar shtetasin V. M., strukturave të Policisë së Shtetit, në Pikën Kufitare të Hanit të Hotit.
Një ditë më parë, nga strukturat policore të DVP Tiranë u kap dhe u vu në pranga njëri nga bashkëpunëtorët në vrasje, 22-vjeçari S. M., nipi i shtetasit V. M.
Ndërkohë, nga Sektori Kundër Krimeve të Rënda në DVP Tiranë, në koordinim nga Departamenti i Policisë Kriminale dhe nën drejtimin e Prokurorisë së Rrethit Gjyqësor Tiranë, vijon puna intensive për zbardhjen dhe dokumentimin e plotë ligjor, identifikimin dhe kapjen e personave të tjerë të përfshirë në këtë vrasje.
Policia e Shtetit falënderon Policinë malazeze për bashkëpunimin, shkëmbimin e informacioneve dhe koordinimin e veprimeve, duke bërë të mundur vënien në pranga të autorit të vrasjes së shtetasit H. B.
/e.rr
