Akuzat e bëra dje nga ana e Presidentit Nishani se në tryezën e Ministrit të Brendshëm ka një dosje informacioni për policët dhe prokurorët e korruptuar, kanë sjellë dhe reagimin e Tahirit. Ministri Brendshëm, përmes një postimi në rrjetin social i është referuar fillimisht përjashtimit të Berishës nga parlamenti, dhe më pas deklaratave të Nishanit.
“Aspak habi që thirrjes së Berishës për mobilizim e armatosje popullore, iu përgjigj ushtari më i bindur. Presidenti ditka dosjet që kam unë mbi tavolinë.
I përgjuari që as tha e as denoncoi kush e përgjonte, ditka dosjet që kam unë mbi tavoline.
Në 2 vjet, mbi 2.000 policë në procedim disiplinor e penal për korrupsion, shumicën prej tyre ish-Ministri i Brendshëm sot President, i mbante në detyrë.
Policia e Shtetit sot në krye të detyrës, si kurrë më parë. Policia, institucioni më i besuar nga qytetarët. Presidenti…në rresht pas SHQUP-it.”- shkruan Tahiri.
“Ka në zyrën e ministrit të Brendshëm një informacion që në polici dhe prokurori, oficerë policie, të lidhur me grupe kriminale. Oficerë të caktuar janë të lidhur me organizata, në trafiqe”, – tha dje Presidenti në emisionin Të Paekspozuarit në Oranews.
