Ministri i jashtëm i Serbisë, Ivica Daçiç, tha se viteve të fundit Zagrebi dhe Beogradi kanë bashkëpunuar mirë, deri në momentin kur në Kroaci kanë filluar ta lavdërojnë lëvizjen e ustashëve.
Në një pyetje në konferencën për shtyp në Beograd, për ta komentuar deklaratën e sotme të ministrit të jashtëm kroat, Davor Ivo Stier, se “në Serbi po qajnë, pasi nga Kroacia është refuzuar kërkesa për takim dypalësh, por për këtë është dashur të mendojnë para se ta sulmojnë kardinalin Stepinac”, Daçiç tha se Serbia nuk i ndryshon qëndrimet e veta politike.
“A mendojnë ata me të vërtetë se dikush në Serbi do ta lavdëroj” kardinalin Stepinac, është shprehur Daçiç dhe ka shtuar se “si është e mundur që gjatë gjithë këtyre viteve kemi bashkëpunuar mirë, derisa nuk kanë filluar ta lavdërojnë lëvizjen ustashe”.
Ministri i jashtëm kroat ka theksuar se, megjithatë, duhet të ekzistoj një kanal i komunikimit me Beogradin, ashtu siç e kanë vendosur kryeministrat, në mënyrë që të zgjidhen çështjet e hapura.
