Edhe këtë verë, Pogradeci mbetet një nga destinacionet më të preferuara të juglindjes. Mes vizitorëve të shumtë, nuk mungojnë edhe shqiptarët që jetojnë prej vitesh jashtë vendit.
Të rikthyer në Shqipëri për pushime, shumë prej tyre zgjedhin qytetin liqenor për atraksionet e rralla si Driloni, klimën e freskët, kulinarinë, mikpritjen, por edhe për çmimet e përballueshme.
Për vizitorët besnikë, qetësia dhe freskia e Pogradecit shijohen duke qëndruar me javë dhe jo me ditë.
Krahas shqiptarëve që jetojnë jashtë, Pogradeci vijon të tërheqë edhe pushues nga qytete të ndryshme të vendit, veçanërisht ata që kërkojnë një alternativë ndaj temperaturave të larta të bregdetit.
Një prej pikave që tërheq më shumë vizitorë është Parku i Drilonit. Peizazhi unik, shëtitjet me varkë dhe prania e shpendëve të ujit e bëjnë Drilonin një nga atraksionet më të frekuentuara, që nuk mbetet jashtë vëmendjes së vizitorëve.
Për ata që jetojnë jashtë Shqipërisë, rikthimi në Drilon merr tjetër kuptim. Shumë prej tyre e kanë vizituar vite më parë dhe sot rikthehen për ta përjetuar si eksperiencë të re.
Me fluksin e vizitorëve që pritet të vazhdojë edhe përtej sezonit veror, Pogradeci po forcon gjithnjë e më shumë profilin e një destinacioni të preferuar jo vetëm për turistët vendas, por edhe për shqiptarët që jetojnë jashtë.
Klan News
