Java ka nisur me diell dhe temperatura të larta. Meteorologia e A2 CNN Tanja Porja paralajmëroi në Dita Jonë se termometri do të ngjitet deri në 34 gradë celsius në disa zona të vendit.
“Sot temperaturat maksimale variojnë nga 26 -28 gradë celsius në skajin verior të Shqipërisë deri në 34 gradë celsius në Elbasan dhe Berat. Ndërsa në vijën bregdetare kemi 31-32 gradë celsius”, tha Porja.
Meteorologia parashikon që temperaturat e larta të vijojnë gjatë gjithë javës. Të enjten mund të ketë reshje të izoluara në veri të vendit dhe një freskim të lehtë të motit nga e mërkura pasdite deri të enjten, por edhe në këto ditë temperaturat do të mbeten mbi 30 gradë celsius theksoi ajo.
“E enjtja sjell ndonjë reshje nga veriu, por kryesisht një mot i kthjellet gjatë kësaj jave dhe po ashtu termometri do të jetë në vlera mjaft të larta. Sot presim të paktën 34 gardë celsius, po kaq vijon gjatë javës. Mëngjeset sa vijnë dhe nxehen. Përjashtuar mëngjesin e së premtes. Ndërsa nga mesdita e së mërkurës dhe deri mesditën e së enjtes kemi një freskim të lehtë të kushteve të motit, por sërish termometri qëndron mbi 30 gradë celsius, ndërsa sot diell dhe temperatura të larta”, tha meteorologia.
Sipas saj era do të fryjë nga jugperëndimi me intensitet të lehtë deri mesatar, më e ndjeshme në gjysmën lindore të vendit.
