Po ti, Doktor i madh, peng i kujt je?

Nga Namir Lapardhaja

Doktor Non Grata është baltëhedhësi dhe modeli perfekt i linçimit dhe i ndërsimit të turmës ndaj kundërshtarëve të tij.

Fjalimet e tij në këtë drejtim të kujtojnë Enver Hoxhën dikur se si hidhte baltë ndaj kujtdo që kishte vendosur për ta eleminuar.

Por Doktor Non Grata nuk na thotë ne se ai vetë peng i kujt është?! Sepse, siç thotë një shprehje e urtë arabe, nuk mund ta gjuash me gur shtëpinë e tjetrit kur tënden e ke prej xhami.

Se Doktori, ndërsa ndaj të tjerëve e ka gjithmonë një akuzë, ndaj vetvetes e ka gjithnjë një alibi. “Ma bën të tjerët”, thotë ai.

Herë ky tjetri është Sorosi, herë McGonigali, herë Lulzim Basha, herë Enkelejd Alibeaj.

Doktori në këtë drejtim është shumë i ngjashëm me Lefter Allën e Bulqizës, i cili deklaroi se ma bëri Rama se nuk donte të kandidoja për bashkinë; si Lefter Koka që thotë se ma bëri Mona dhe Ahmetaj; si Ben Tigri që do thotë ma bëri Veliaj se dyshon se shita tek kundërshtarët Lefterin; si Saje Qorri që thotë se ma bën se donin t’i hapnin rrugën Velisë për marrjen e PS-së pas Ramës apo edhe të tjerëve, të cilët gjithmonë e kanë një alibi.

Askush nuk pranon të marrë diçka përsipër. Janë gjithnjë të tjerët fajtorët. Ndaj Doktor Non Grata t’i lërë akuzat dhe të na thotë: Po ti, Doktor i madh, peng i kujt je?