Nga Artur Ajazi/
Ka marrë fund me dështim të plotë dhe spektakolar, “uragani” popullor i Lulzimit dhe Monikës, protesta më e vakët që ka zhvilluar ndonjëherë Partia Demokratike qysh nga krijimi saj. Ka qenë një ngjarje e turpshme, bajate, e cila u parapri nga paralajmërime të neveritshme të një opozite të kapitulluar, të rrëgjuar, të hutuar, të molepsur, të paaftë, e cila nuk arriti as në 16 mars, të ngrinte në “këmbë 150 mijë vetë” për të rrëzuar qeverinë Rama.
Protesta e sotme, ishte pamja më tragjikomike e një opozite që rrotullohej e rrotullohej rreth institucioneve kushtetuese, duke u paraprirë nga kryetari Basha dhe pasuesit e tij ish-a. Ata tashmë pothuajse të gjithë janë “ish-a”, ish-deputetë, ish-sekretarë, ish-opozitarë, ish-kryetarë, dhe të tillë do të mbeten deri në 2021. Ata të gjithë janë pas 16 marsit, ish-denoncues të neveritshëm, ish-paralajmërues të skaduar, që tentuan të bëjnë “të fortin” me ligjin, me institucionet kushtetuese, por që në fakt u mblodhën tek selia e SHQUP-it, duke dëgjuar kryetarin e tyre ti këndonte himnin e flamurit, dhe kaq.
Protesta e 16 marsit, ishte triumfi i Flamurit, atij që dikur zihej me ministrat dhe kryeministrin në sallën e Parlamentit, dhe dje u caktua nga “lideri” Basha të bënte hapjen e “protestës popullore”, duke u bërë gazi botës. Ata që provuan edhe njëherë të “rrëzonin qeverinë Rama” dhe dolën më keq se bllofi, ata që e provuan edhe njëherë të mblidhnin në shesh “150 mijë vetë” dhe që nuk mblodhën as 15 mijë, nga sot duhet të largohen, madje natën. Largohu Lulzim dhe Monika, largohuni dhe do ta shihni se do të ndjeheni më të dlirët në shpirtin tuaj, hapini rrugën atyre që duhet të marrin në dorë frenat e partive tuaja të shkërrmoqura nga mëkatet dhe negativitetet politike. E provuat edhe njëherë sheshin dhe mejdanin, e provuat dhe nuk ju eci, tani është rradha juaj. Largohuni dhe do ta shihni se do të jeni më të respektuar nga shqiptarët, por jo nga ligji.
Protesta e sotme ishte triumfi i marrëzisë, së një grushti kryetarësh pa parti, që deklarojnë gjithë ditën se “jemi opozita e bashkuar”, e një grushti kryetarësh që mbledhin njerëzit me autobuzë, dhe pastaj i lënë rrugëve të Tiranës si të ishin jabanxhinj. Rama nuk iku edhe në 16 mars, dhe as ka ndërmend të ikë edhe në 2021, sepse ka vendosur të bëjë shtetin, atë që ju, sa ishit në pushtet nuk e bëtë, por e zhbëtë, e shtrydhët, e grabitët, e deformuat, e shpërfytyruat. Rama nuk iku, sepse erdhi me votën e shumicës së shqiptarëve, dhe do të largohet me votën e shumicës së tyre, por deri atëhere ka kohë.
Rama nuk iku sepse ka mbështetjen edhe të ndërkombëtarëve, të atyre që sulmoni ju gjithë ditën dhe gjithë natën, e atyre që u futën ju, “dy këmbët në një këpucë” qysh protestën e parë kur sulmuat me flakadanë Kryeministrinë dhe Parlamentin. Tani është momenti, është koha juaj Lulzim dhe Monika, është rradha juaj të largoheni, dhe të mbyllni ciklin e mbijetesës tuaj politike, të shpëtoni partitë tuaja nga shkrirja e plotë. Nesër do të jetë vonë, sepse njerëzit nuk ju ndjekin më.
Njerëzit tuaj u lodhën me ju, me profkat tuaja, me premtimet tuaja, me paralajmërimet tuaja , me parapagesën tuaj për autobuzë dhe sufllaqe, ndaj largohuni. Eshtë rradha juaj. Sa për Ramën, ai tani ka ardhur, dhe as ka ndërmend ta mendojë largimin, aq më tepër kur e kërkoni ju, pasi ka vendosur të bëjë shtetin, të bëjë Shqipërinë.
