Dëgjova Agron Shehaj që tha se këtë ftesë e ka marrë edhe Presidenti i Bjellorusisë, që është diktator.
Tani mirë mbështetësit e Berishës, që janë të dëshpëruar se kjo ftesë anulon helikopterët e forcave “Delta” që do vinin ta arrestonin, po ç’kusur kanë edhe mbështetësit e Shehajt që besonin se ai konsultohej me Trumpin para çdo deklarate që bënte. Madje ishin gati të besonin që ai po zbatonte planin amerikan kundër Ramës dhe Berishës në vend.
Tani, meqë kjo çështje nga dramatike u bë qesharake, kam një pyetje: nëse do të ndodhte e kundërta, si do reagonin këta nëse Presidenti Trump nuk e ftonte Edi Ramën tek ky Bordi i Paqes?
Jam dakord për një moment me të gjitha kritikat ndërkombëtare për këtë Bord, me të gjitha vërejtjet që Agron Shehaj ka bërë se është ftuar edhe Presidenti i Bjellorusisë dhe me të gjitha vërejtjet që kanë këta të PD-së se ky Bord është kot se do paguajmë 1 miliard dollarë Trumpit.
Po sikur të mos ta kishte ftuar Presidenti Trump Edi Ramën?
Atëherë do të dëgjonim një kor të tërë trushpëlarësh që do ta shpallnin Shqipërinë vend antiamerikan për shkak të Edi Ramës, që Presidenti Trump nuk e përfilli (në fakt nuk ka përfillur shumicën e Ballkanit), dhe që kjo ndodhi sepse Edi Rama ka lidhje me Sorosin dhe krimin e organizuar e gjithë marrëzitë e tjera.
Dhe e gjithë kjo vjen nga fakti se opozita jonë ka humbur rrugën në oborr dhe nuk përpiqet të bëjë politikë bazuar mbi të vërtetat e dhimbshme të realitetit shqiptar dhe të ngjallë shpresë tek njerëzit me ide apo projekte të tyre, por ka vendosur të vijë në pushtet duke u mbushur mendjen njerëzve se në pushtet vihet duke blerë SHBA-në.
Kanë një vit që gënjejnë demokratët, madje u marrin edhe 6 milionë euro për t’i gënjyer që do blejmë LaCivitën të na sjellë në pushtet dhe tani rezulton që as zgjedhjet nuk i fituan me të, as “non grata” e Berishës nuk u hoq. Tani atë që nuk e bën dot me lek, mendojnë se po e bën kundërshtari i tyre dhe çdo sukses ndërkombëtar të Shqipërisë e lidhin me një faturë apo pagesë që Edi Rama i ka bërë për hallet e veta.
Ata tani janë gati ta konsiderojnë një ftesë që e nderon Shqipërinë si një ftesë të blerë, tek aleati i tyre Trump, duke e fyer edhe atë, pasi e paraqesin si një tregtar ftesash. Sikur të mos ishte ftuar, do ta paraqisnin si një dështim të Shqipërisë për shkak të Edi Ramës, që në fakt prapë nuk do të ishte e vërtetë, pasi aty janë vetëm 60 vende nga e gjithë bota.
Kjo qasje poshtëruese që ata kanë, në radhë të parë për veten si njerëz që mendojnë se mund ta blejnë pushtetin në SHBA dhe pastaj edhe për sukseset e raporteve të Shqipërisë me SHBA, është arsyeja pse ata janë katandisur në një grusht trushpëlarësh që duken njerëzit më qesharakë në këtë vend.
Tani ndaleni mendjen dhe na thoni: a do ishte më mirë të mos e ftonin Shqipërinë, apo më mirë që e ftuan? Se pastaj atë pjesën nëse duhet pranuar ftesa apo jo, meqë është ftuar edhe Bjellorusia, e shpjegon Agroni.
