Anëtarët e Komisionit të Reformës në Drejtësi janë njoftuar se mbledhja e radhës do të mbahet ditën e nesërme. Komisioni i Posaçëm pritet të diskutojë të mërkurën paradite për 7 ligjet e mbetura pezull, miratimi i të cilëve do të sillte edhe implementimin më të shpejtë të reformës.
Po sot, mediat kanë shkruar se ka qenë kërkesa e SHBA dhe BE që miratimi i 7 ligjeve të fundit të bëhej brenda muajit korrik, ose në të kundërt vendi humbiste edhe fonde të parashikuara nga Bashkimi Europian.
Ndërkohë, kreu i Kuvendit, Ilir Meta, nuk e përjashtoi mundësinë e mbledhjes së një seance të mundshme ditën e enjte. Më parë, edhe deputetja e PD Jorida Tabaku u shpreh se opozita do të japë konsensusin edhe për 7 ligjet e mbetura.
Burime nga Kuvendi njoftojnë se të enjtën pritet seanca e jashtëzakonshme për miratimin e projektligjeve që i japin jetë reformës në drejtësi. Megjithatë, një seancë e mundshme ditën e enjte ende nuk është konfirmuar zyrtarisht.
