Nga Ben Andoni
Në ditët e fundit ka një ankth, që është i justifikuar tek nëpunësit e ndryshëm të strukturave burokratike shqiptare. Pas njoftimit të DAP-it për shërbimin civil, lidhur me shkrirjen e disa ministrive, ka vijuar një udhëzim që u është përcjellë shumë punonjësve të drejtorive dhe inspektoriateve, ku njoftohen se vendet e punës do mbyllen ose në më të mirën u kërkohet që të vetë-largohen. Pa i dhënë ngjyresa krejt të errëta: Ka edhe një mundësi të fundit, që punonjësit do rifuten në teste, ku mund të integrohen në vende të tjera pune. A është thjesht kjo një mundësi për t’u justifikuar? A do shkojë deri në fund? A ka fund strukturimi i administratës dhe ndërrimi i saj? Të gjitha këto pyetje presin ditët në vazhdim dhe ecurinë e reformës së re administrative.
Është i kuptueshëm paniku dhe turbulenca sociale, tek ata që do humbin punët, efektet e të cilës përcillen prej kësaj pjese të shoqërisë dhe vijojnë edhe në pjesët e tjera. Media referon për shkarkime masive në Burimet Natyrore, për dhjetëra punonjës syresh dhe po ashtu janë paralajmëruar shkarkime në inspektoriatet e Mjedisit, Shëndetësisë dhe Ushqimit, Mbrojtjes së Territorit. Kurse në drejtori të ndryshme si ajo e Bujqësisë, Pyjeve, AKU, Bordi i Kullimit është nisur një udhëzim ku punonjësit lajmërohen se u mbyllet vendi i punës si rezultat i strukturimit që do të vijojë.
Ashtu si merret me mënd më të ekspozuarit janë njerëzit që janë të lidhur me formacionin politik LSI. Urrejtja brenda llojit tashmë ka shkuar në ekstrem. Prishja e koalicionit parazgjedhor i ka kushtuar shumë partisë së familjes Meta. Dhe, ajo që është bërë mezi deri tani, duke përcjellë nëpunës fajtorë para gjyqit, që kanë qenë bajagi të shumtë e të referuar rregullisht, tani duket se do bëhet pa hezitim.
Por për shoqërinë, më shumë sesa kjo valë e fundit, ka nevojë të dihet diçka: Pse në momentin kur militantët punësoheshin masivisht dhe madje publikisht shumë drejtorë deklaroheshin se vetëm listave të LSI-së nuk kishin se çfarë t’u bënin, nuk bëhej asgjë dhe qeveria Rama mbyllte sytë?! Pse ka gjithnjë strukturime e strukturime në administratat tona, sipas rendi të një karuseli që nuk ndalet? Çfarë do të ndodhë pas katër vitesh, nëse qeveria Rama, do të humbë dhe në vend të saj do vinë forcat e tjera? Pse për reforma të tilla s’ka dakordësi me bazë të gjerë. Përgjigjja pak a shumë dihet. Historia na ka mësuar se do të ndodhë e njëjta gjë, por e justifikuar me kopertura strukturimesh të tjera. Dhe, historia do të vijojë prej fillimi.
Me sa duket, Shqipëria është e nëmur ta vuajë kompleksin e Rozafës në çdo fushë, sektor dhe strategji, sepse akoma është në hapat e para të krijimit të një identiteti, që kërkon duke zhbërë edhe punën për të vetë!!! (Javanews)
