Banorë të lagjes Kovaç në fshatin Vlahen të bashkisë së Hasit kanë protestuar në hyrje të galerisë për shfrytëzimin e kromit nga një firmë turke, “Vllahen Mining”, pasi punimet e kësaj firme kryesisht shpërthimet me eksploziv po u dëmtojnë banesat dhe po ua bëjnë jetën mjaft të vështire me ankth dhe frikë.
Në mbështetje të këtyre banorëve ishte edhe nënkryetari i bashkisë së Hasit sipas të cilit institucionet qendrore përgjegjëse për kontrollin e firmës turke, nuk i kanë kthyer përgjigje.
Në lidhje me shqetësimin e banorëve ka reaguar edhe administratori lokal i firmës turke, sipas të cilit matjet dhe verifikimet e kryera nuk justifikojnë shqetësimet e banorëve.
Sakaq banorët kanë paralajmëruar se nëse nuk merren masat e duhura ato do të përshkallëzojnë protestën e tyre deri në bllokimin e rrugës dhe punimeve në minierë.
