Partia Demokratike akuzoi ministren e Arsimit Lindita Nikolla se po mban peng dëftesat për 420 mijë nxënës. Po ashtu, selia blu ka hedhur akuza prej ditësh së dëftesat janë me gabime.
Pas akuzave, ka ardhur reagimi i ministres së Arsimit Lindita Nikolla. Ajo hedh poshtë pretendimet e opozitës teksa deklaron se dëftesat po shpërndahen.
Po ashtu, ajo mohon që dëftesat të jenë me gabime.
“Informoj nxënësit dhe prindërit se pasi përfunduam plotësimin e certifikatës dhe diplomës për maturantët, po vijojmë me plotësimin e dëftesës së lirimit, si dhe të dëftesave të tjera të arsimit parauniveristar. Nuk ka asnjë dëftese me gabime. Ashtu sikurse nuk ka asnjë nxënës që pengohet për t’u regjistruar brenda apo jashtë vendit.
Janë plotësuar dhe legalizuar çdo diplomë e maturantëve që kërkojnë të studiojnë jashtë shtetit”, deklaroi Nikolla.
Ajo sfidoi opozitën teksa tha më tej: “Të tregoj një emër maturanti PD që pengohet për shkak të certifikatës”.
Reagimi i plotë i Nikollës:
Informoj nxënësit dhe prindërit se pasi përfunduam plotësimin e certifikatës dhe diplomës për maturantët, po vijojmë me plotësimin e dëftesës së lirimit, si dhe të dëftesave të tjera të arsimit parauniveristar. Nuk ka asnjë dëftese me gabime. Ashtu sikurse nuk ka asnjë nxënës që pengohet për t’u regjistruar brenda apo jashtë vendit.
Janë plotësuar dhe legalizuar çdo diplomë e maturantëve që kërkojnë të studiojnë jashtë shtetit. Qendra e Shërbimeve Arsimore ka punuar orar pa orar dhe nuk kemi patur asnjë ankesë për vonesë apo mosmarrje diplome.
Të tregoj një emër maturanti PD që pengohet për shkak të certifikatës.
Ka vetëm një mungesë. Mungesa e alternativës nga një parti e zhytur në gënjeshtra e shpifje të ulta.
Shpifja nuk është alternativë për arsimin. Gënjeshtra jo e jo!
Unë jam në krye të detyrës. Takoj çdo ditë prindër, nxënës e mësues.
Me pushime ndoshta është z. Boçi që flet përçart për pazare e afera.
Boll më me farsën e paturp të njeriut që fshihet pas tezës që kjo është politika, ndaj mos i merr seriozisht se çfarë them unë.
Jo, jo, unë jam serioze në atë çfarë bëj e them zoti Boçi. Dhe mbaj çdo përgjegjësi, ndaj do t’i drejtohem prokurorisë për shpifje.
Për mua kjo është politika më e keqe.
Mungesën e alternativës ta zëvendësosh me shpifje e denigrime.
Dëftesat po shpërndahen dhe tenderi është kryer sipas procedurave ligjore, jo nga Ministria e Arsimit, Rinisë dhe Sporteve por Ministria e Brendshme.
Mësoje zoti Boçi para se të akuzosh.
/a.m.
