Nga Denis Dyrnjaja
Protesta hyri në javën e dytë. Kreu i Partisë Demokratike çdo ditë shfaqet në çadrën opozitare në përpjekje për të mbajtur lart moralin e protestës dhe protestuesve me sulme e premtime politike. Dakord gjithçka kur e sheh në këndvështrimin e përgjithshëm është brenda kontestit politik normal. Por anormaliteti fillon atëherë kur ballafaqohen realitetet dhe kjo pastaj lidhet edhe me besueshmërinë që degradon kur dëgjon p.sh sesi Basha flet për zgjedhje të ndershme, kur i vodhi Edi Ramës sy për sy mandatin e katërt si kryebashkiak, duke tjetërsuar rezultatin e zgjedhjeve lokale në Vitin 2011 dhe duke rrëmbyer një mandat gjatë së cilit nuk bëri asgjë për Tiranën.
Basha flet për kushtetutshmëri për reformë drejtësie apo për drejtësi të pavarur kur vendosi të mos zbatonte urdhërin e prokurorisë për arrestimin e gardistëve që u morën nën mbrojtje të ngujuar në selinë e qeverisë nga Kryeministri Berisha. Basha heshti, Basha nuk veproi, Basha bashkëpunoi për të fshehur vrasësit me uniformë shtetërore të katër protestuesve të pafajshëm në bulevardin ku ai dhe mbështetësit e tij protestojnë qetësisht pa i provokuar, madje duke iu garantuar edhe siguri.
Lulzim Basha flet për abuzime marramendëse të kësaj qeverie dhe korrupsion. Por në fakt është njeriu që akuzohet për 220 milion dollarë fonde të abuzuara në Rrugën e Kombit kur ishte ministër transporti dhe i shpëtoi gjykimit me procedurat për këtë çështje, që edhe sot e kësaj dite ka mbetur pa u hetuar dhe gjykuar siç duhet. Lulzim Basha flet për trafik hashashi dhe me të drejtë në fakt, por morali bie kur në kohën e tij si ministër i punëve të brendshme Lazarati lulëzonte në çdo cep dhe ishte simboli i Evropës për prodhimin dhe cilësinë e Cannabisit. Pra të gjithë ata që janë në çadër, të gjithë ne duam ta besojmë Lulzim Bashën për gjithçka thotë sot, por çështja është se vetë Lulzim Basha a e beson veten e vet duke patur parasysh kush dhe si është në realitet?!
