Aktorja Kaltrinë Zeneli ishte pikërisht ajo që shpërndau në rrjete sociale videon ku dhunohej e moshuara në shtëpinë e të Moshuarve në Pejë. Ajo tha gjatë një prononcimi për “Telegraf” se ka marrë shumë kërcënime nga disa njerëz për shpërndarjen e videos.
“Është e vërtetë që unë po kërcënohem në rrjetet sociale për videon që e kam shpërnda gjatë natës së mbrëmshme. Por, realisht unë në rrjetet e mija sociale e kam emrin Kaltrinë Zeneli dhe jo Kaltrina Zeneli dhe personat të cilët kanë kërcënuar dikë tjetër. Vajza në fjalë më është drejtuar mua dhe m’i ka dërguar mesazhet që ka marrë prej personave të ndryshëm. Vajza që ka emrin e njëjtë me mua më ka treguar se e ka denoncuar njërin prej komentuesve që i ka dërguar një mesazh kërcënimi”, theksoi ajo.
Mirëpo, ajo sqaroi edhe keqkuptimin për të, ku shumë njerëz dyshojnë se ishte pikërisht aktorja ajo që kishte xhiruar videon.
“Njerëzit po mendojnë që vajza e cila e ka xhiruar atë video kam qenë unë, është një keqkuptim këtu. Unë nuk kam xhiruar, nuk jam pjesë e videos. Jam ajo që e kam shpërnda dhe e kam denoncuar rastin gjë që nuk jam fare e penduar. Unë kam marrë kërcënime edhe nga njerëz që më kërcënojnë me gjuhë të ndryshme si spanjolle, italisht dhe anglisht. Unë po brengosem për vajzat që e kanë emrin si unë dhe po përballen me këtë rast”, përfundoi ajo.
