Në seancën e sotme plenare pritet të miratohen ndryshimet në Kodin Zgjedhor.
Të dy palët pritet të miratojnë ndryshimin që shteti do të paguajë postën për votat e diasporës, duke mos lënë asnjë kosto për emigrantët në këtë proces si dhe mbi ndryshimin e afatit për regjistrimin e kandidatëve dhe partive për t’i dhënë më shumë kohë KQZ-së për pergatitjen e fletëve të votimit dhe dërgimin e tyre tek diaspora.
Por në nisje të diskutimeve, deputeti Erion Braçe kritikoi kreun e KQZ, Ilirjan Celibashin i cili tha se nisma e tij (pr. Ligjit për Tatimet ) ndikon elektoralisht.
Ai e ka sulmuar me fjalë thyese “injorant” duke shtuar se “Duket që nuk e ka lexuar’’. Ndërsa kryetarja e Kuvendit i ka kërkuar Braçes që të përfundojë fjalën sa më parë.
”Komisioneri i ka rekomanduar Kuvendit mos miratimin e nismës. Ajo që më bën përshtypje dhe të më vijë keq ka të bëjë me faktin që ai nuk e ka lexuar nismën. S’kam dalë nga rendi i ditës të flas për qiellin.
Kërkoj nga Kuvendi që të ecë para me nismën sepse nuk ka asnjë lidhje me atë që pretendon komisioneri dhe nuk ka lidhje me asnjë injorant tjetër që nuk lexon në këtë vend, edhe në këtë sallë po të doni. Të eci përpara dhe në qoftë se komisioneri ka ndërmend të vendosë gjobë do ta paguaj unë gjobën në emër të Kuvendit.”
Ndërkaq, PS nuk pranon propozimin e opozitës per votim me dokumenta të huaja, ndersa ka pranuar propozimin që votat e diasporës të numërohen nga komisionerë politikë.
