Ndalimi i autobusëve të Kosovës në rrugën e Plazhit ose në rrugën “Pavarësia” është bërë nga Bashkia e Durrësit. Bashkia e qytetit bregdetar ka vendosur të mos i lejojë këta autobusë të kalojnë e të parkojnë në këtë rrugë me argumentin se krijohet kaos në trafik.
Ky vendim i Bashkisë së Durrësit është marrë në bashkëpunim me policinë e qarkullimit rrugor dhe Drejtorinë e Rrugëve dhe nga specialistët e Prefekturës së Durrësit, të cilët kanë vendosur devijimin e trafikut për pushuesit që mbërrijnë nga Kosova, shkruan “Koha Ditore”.
Ndërkohë që autobusët me turistë të huaj (që nuk janë nga Kosova) qarkullojnë pa asnjë problem në rrugën e plazhit, sepse, sipas prefektit të Durrësit, janë më të pakët në numër sesa autobusët me kosovarë. Ky veprim i autoriteteve vendore të Durrësit shihet si i njëanshëm, arbitrar dhe antiligjor. Kjo për faktin se edhe vizitorët nga Kosova në Shqipëri emërtohen si “shtetas të huaj” sikurse ata që vijnë nga Evropa Jugore. (b.an)
