Dosja “Plumbi i Artë” vijon gjykimin në Gjykatën e Posaçme Kundër Korrupsionit dhe Krimit të Organizuar. Pas dëshmive të Nuredin Dumani, tashmë i ka ardhur radha të pandehurve të tjerë që të flasin në gjyq.
Siç ka mësuar gazetarja Glidona Daci, i pandehuri Xhulian Hoxha ka bërë një deklaratë të fortë në seancën e sotme. Për vrasjen e Elton Kilës, i njohur si “Oti”, ai pretendon se financues dhe organizator nuk është Suel Çela siç pretendon Nuredin Dumani, por Erjon Alibej. Sipas Hoxhës, ai ka dashur ta eliminojë Kilën pasi ka pasur një marrëdhënie intime me bashkëshorten e tij.
“Unë do flas më shumë për këtë gjë në një moment të dytë”, mësohet të jetë shprehur Hoxha.
Ndërkohë Alibej, i cili po ashtu është i penduar i drejtësisë si Nuredin Dumani, është shprehur që nuk i duket etike kjo që ka thënë Hoxha. Për këtë arsye mes të dyve, siç raporton gazetarja Daci, ka pasur një debat.
“Kam marrë burg përjetë nga fjalët e tua. Ty çfarë të dogji nga ajo që thashë unë?”, mësohet t’i ketë thënë Hoxha.
Ndërsa Alibej ka kërkuar durim pasi kur të fillojë me deklarimet do të dëgjohet për shumë “Suel Çela” të tjerë të Shqipërisë.
“Mediat të bëjnë durim deri sa unë të filloj deklarimet. Do dëgjoni jo vetëm për Suel Çelën, por edhe për shumë “Suel Çela” të tjerë të Shqipërisë. Janë thënë shumë trillime dhe shumë të pavërteta. Bëni durim se do sqarohen të gjitha”, është shprehur ai.
Kujtojmë se Nuredin Dumani mbeti i plagosur në momentin që ishte nisur për të vrarë “Otin”. Sipas tij, Suel Çela i kishte kërkuar vrasjen e Kilës për 200 mijë Euro.
