Kosova po shqyrton mundësinë e mbylljes së rrjetit social Tik Tok. Lidhur me këtë u diskutua në Komisionin për Çështjet e Sigurisë dhe Mbrojtjes të Kuvendit. Deputetët nga mazhoranca dhe opozita përmendën rreziqet që po vijnë nga kjo platformë, ndërsa e pranishme në mbledhje ishte edhe kryetarja e Agjencisë për Informim dhe Privatësi, Krenare Sogojeva-Dërmaku.
“Cilat janë mundësitë tona për ta shtrënguar këtë punën e TikTokut, pasi e dini ka qenë shqetësim i jashtëzakonshëm. Ka vende të ndryshme evropiane kur kërkohet letërnjoftimi i personit në fjalë ku kërkohet të hapet llogaria. Kjo eviton mundësinë e hapjes së llogarive të fëmijëve të mitur, po flas nën moshën 16 vjeçare… Është edhe një kërkesë për me mbyllë, por ndoshta mundet me shpjegu nëse këto rrjete sociale nuk i respektojnë rregullat e vendit, cila është mundësia me mbyllë komplet?”, u shpreh deputeti i Lëvizjes Vetëvendosje, Dimal Basha.
“Tash janë bërë shumë aplikacione, shumë rrjete. Tik-Toku është njëri prej rrjeteve që po duket se është jashtë kontrolli dhe është më i dëmshme. Nëse ShBA-të ndihen të rrezikuar nga Tik-Toku, atëherë Kosova e vogël natyrisht se do të jetë. Ne duhet të mendojmë këtu për reduktimin e tij ose ndalimin e tij. Duhet të mendojmë si shtet në këtë formë”, u shpreh Hisen Berisha, deputet i Partisë Demokratike të Kosovës.
Kryetarja e Agjencisë për Informim dhe Privatësi tha se mbyllja e kësaj platforme sociale është kompetencë e qeverisë.
“Sa i përket Tik-Tokut, kemi krijuar marrëdhënie bilaterale me ta. Kemi rritur moshën, politikat e privatësisë. Ta keni parasysh se te çështjet e platformave sociale në Kosovë, te problemi bazik është mungesa e domenit të Kosovës, domen zyrtar. Kemi shumë përdorues që operojnë në Kosovë por operojnë edhe jashtë në vende të tjera…Në flasim si shtet me ndalu apo mos me ndalu kjo nuk është në kompetencat e Agjencisë, por duhet të vendosë shteti”, tha Krenare Sogojeva-Dërmaku, kryetare e Agjencisw për Informim dhe Privatësi.
Në këtë mbledhje, Komisioni për Çështje të Sigurisë dhe Mbrojtjes miratoi planin e performancës së Agjencisë për Informim dhe Privatësi për vitin 2025. Kryetarja Sogojeva-Dermaku, para deputetëve tha se prioritet e agjencisë është mbrojtja e të dhënave personale. Sipas saj, një gjë e tillë do të arrihet përmes shtimit të inspektimeve dhe ngritjes së kapaciteteve.
/a.r
