Shqipëria ka tashmë një platformë të qartë për zhvillimin e turizmit elitar në vendin tonë.
Në platformën e re fiskale të vitit të ardhshëm, e cila duhet ende të miratohet në Kuvend, parashikohet që të gjithë ata që do të investojnë në ndërtimin e strukturave akomoduese me 5 yje, nuk do të paguajnë tatim fitim për dhjetë vitet e para të aktivitetit të tyre në vend.
Njëkohësisht, bizneset që do të investojnë paratë e tyre për zhvillimin e një sektori të turizmit elitar në vendin tonë, do të përjashtohen nga detyrimi për të paguar taksën e ndikimit në infrastrukturë.
E gjithë kjo do të ndodhë paralelisht me një tjetër strategji të miratuar tashmë nga qeveria, për ndërtimin e një rrjeti porte jahtesh në të gjithë gjatësinë e vijës bregdetare të Shqipërisë.
Këto lehtësira u zbuluan ditën e enjte, në fjalën e mbajtur nga Ministri i Financave, Arben Ahmetaj, në forumin e “Tirana Business Matching”.
Të gjithë këto masat pritet që t’i japin një hov të mëtejshëm industrisë së turizmit, një sektor i cili punëson mbi 55 mijë shtetas dhe kontribuon me 10-12% të PBB të përgjithshme të vendit.
Në vitin 2016, të ardhurat nga turizmi shënuan rekordin e 1,5 miliardë eurove, ndërsa pritet që në vitin aktual, të ardhurat nga turizmi të rriten më tej, duke prekur shifrën e 1,7 miliardë eurove.
Sipas parashikimeve të Bankës Botërore, një zhvillim i qëndrueshëm i sektorit turistik gjatë 10 viteve të ardhshme, mund të lejojë që deri në 2030-n, 250 mijë shqiptarë të jenë të punësuar në këtë sektor.
a.ç
