Atmosfera nuk është aspak pozitive në shtëpinë e Lacios, ku duket se nervozizmi ka prekur majat në ambientin bardhekaltër.
Për këtë gjë është i vetëdijshëm trajneri Stefano Pioli dhe grupi i futbollistëve që ai drejton, teksa në seancën e fundit stërvitore, në vigjilje të ndeshjes kundër Gallatasarajit, e vlefshme për Ligën e Europës, ka shpërthyer një zënkë masive brenda grupit.
Sipas asaj që raporton e përditshmja italiane “Il Messaggero”, tetë lojtarë të Lacios kanë qenë protagonistë në sherrin që ka shpërthyer në “Formello”, i cili raportohet se ka qenë shumë i dhunshëm. Ky është episodi i tretë që ndodh brenda një afati të shkurtër kohor.
Në Stamboll mësohet se drejtori sportiv i Lacios, Igli Tare, ka kapur nga fyti futbollistin italian, Antonio Kandreva, i cili po debatonte me tone të ashpra me Miroslav Klosen në dhomat e zhveshjes. Arsyeja e sherrit është egoizmi i tepruar i Kandrevës në fushën e lojës.
Ndërsa flitet se trajneri Pioli nuk ka reaguar pas sherrit të fundit që shpërtheu në fushë mes lojtarëve, duke pritur që “ujërat të qetësohen”.
Në fund, tekniku italian është munduar për të qetësuar situatën duke i ftuar të gjithë protagonistët e përfshirë në sherr që të konfrontohet dhe të sqarohen me njëritjetrin. Nuk e dimë nëse Pioli ka arritur t’i qetësojë gjakrat e ndezur, por përgjigjja e ekipit në fushë ka qenë shumë pozitive, pasi Lacio është skuadra e vetme italiane e kualifikuar për në Ligën e Europës. Panorama sport
