Dy deputetët e kampeve të kundërta politike, Piro Lutaj i Partisë Socialiste dhe Asllan Dogjani i PD, kanë nisur fillimisht të replikojnë ashpër mes tyre deri në fyerje, gjatë mbledhjes me dyer të mbyllura të komisionit parlamentar të sigurisë.
Konflikti ka përshkallëzuar deri në përplasje fizike mes deputetëve. Të bërtiturat dhe të sharat e deputetëve janë dëgjuar në të gjithë korridorin e Kryesisë së Kuvendit. Komisioni i sigurisë kishte thirrur për raportim numrin dy të SHISH, Ylli Alushi, për të diskutuar mbi masat anti- terrorizëm që janë ndërmarrë deri më tani, pas sulmeve të Parisit më 13 nëntor.
Dy deputetët janë ndarë falë ndërhyrjes së punonjësve të Gardës së Republikës, të cilët kanë ndërhyrë në mbledhjen e komisionit, duke larguar deputetët.
Reagojnë deputetët
Pas raportimit në media, mdeputetët Piro Lutaj dhe Asllan Dogjani kanë mohuar faktin se mes tyre ka patur përlasje fizike. Palët janë njëzëri mbi këtë pikë, duke saktësuar se ka patur vetëm debate dhe replika verbale.
