Shefi i X dhe Tesla, Elon Musk, ka bërë thirrje për themelimin e një partie të re në SHBA, që sipas tij do kujdeset vërtet për njerëzit.
Përmes një postimi në rrjetin e tij social X, ai ka kritikuar sërish projektligjin e administratës Trump, që u bë mollë sherri mes tij dhe presidentit amerikan dhe çoi në përplasje të forta mes dikur ish-aleatëve të ngushtë.
Musk shkruan se projektligji në fjalë do rritë kufirin e borxhit në shifrën e paparë 5 trilionë dollarë dhe kjo ndodh pasi amerikanë jetojnë në vendin e “partisë së derrave të këqinj”.
“Është e qartë me shpenzimet marramendëse të këtij projektligji, i cili rrit kufirin e borxhit me një rekord prej PESË TRILIONË DOLLARËSH, se jetojmë në një vend me një parti – PARTIA E DERRAVE TË KËQIJ! Koha për një parti të re politike që kujdeset vërtet për njerëzit”, shkruan Musk.
Donald Trump u përgjigj me kërcënimin se “ndoshta ai (Musk) duhet të shkojë në shtëpi në Afrikën e Jugut”.
“Elon ndoshta duhet ta mbyllë biznesin e tij dhe të kthehet në atdheun e tij, Afrikën e Jugut”, tha Trump.
“Elon Musk e dinte, shumë kohë para se të më mbështeste me kaq forcë për presidencën, se unë isha kundër fuqimisht makinave elektrike të detyrueshme. Është qesharake dhe gjithmonë ka qenë një pjesë e madhe e fushatës sime. Makinat elektrike janë në rregull, por jo të gjithë duhet të detyrohen të blejnë një të tillë”, vijoi presidenti amerikan.
“Elon mund të marrë më shumë subvencione se çdo person tjetër në histori, dhe pa subvencione, Elon ndoshta duhet ta mbyllë biznesin e tij dhe të kthehet në atdheun e tij, Afrikën e Jugut.
Nuk do të ketë më lëshime raketash, satelitësh apo prodhim makinash elektrike, dhe vendi ynë do të kursejë pasuri. Ndoshta duhet t’i kërkojmë DOGE-it ta marrë seriozisht në konsideratë këtë? DO TË KURSEJË SHUMË PARA!!!”, përfundoi presidenti amerikan postimin e tij.
