Tiranë/ 1500 efektivë policie do të angazhohen në terren për mbarëvajtjen e protestës së thirrur nga Partia Demokratike dhe Lëvizja Socialiste për Integrim nesër në orën 12:00.
Burime pranë policisë së shtetit bëjnë me dije se janë marrë të gjitha masat e nevojshme për mbarëvajtjen e protestës, që do zgjasë rreth katër orë, dhe shmangien e incidenteve
Të angazhuar do jenë FNSH, Forcat e Rendit dhe ato operacionale. Raportohet se në terren do të ketë edhe agjentë civil dhe të Shërbimit Informativ Shtetëror (SHISH).
Sipas burimeve nga policia, pranë vendit ku do të mbahet protesta do stacionohen edhe ambulanca dhe shërbimi zjarrfikës, në rast incidentesh, apo problemesh shëndetësore.
Mësohet se u është lënë detyrë komisariateve të evidentojnë personat e dhunshëm, të cilët do të monitorohen me agjentë civilë.
Protesta paralizon trafikun
Policia rrugore ka njoftuar bllokimin e disa akseve rrugore.
Sipas burimeve, autobusët që do të vijë me protestues nuk do të lejohen të futen në qytet.
Ata që vijnë nga ana veriore do stacionohen pranë stadiumit “Asllan Rusi” ndërsa nga ana jugore tek Fakulteti Ekonomik.
Do të ndalohet qarkullimi dhe parkimi i mjeteve tek bulevardi Dëshmorët e kombit dhe rrugët ndërlidhëse të tij. Kufizim të pjesshëm mund të ketë edhe rruga që lidh selinë e PD me kryeministrinë.
a.ç
