Grupi hetimor që është duke punuar për zbardhjen e tentativës së grabitjes së bankës së nivelit të dytë në Tiranë, kanë zbuluar se autorët në dyshemenë e bankës kishin hapur vende të ndryshme për të vendosur kamera të vogla vëzhguese.
Kjo sipas policisë për të vendosur kamera me anë të së cilave do kontrollonin lëvizjet e punonjësve të bankës por për të mësuar dhe planimetrinë e bankës. Autorët kanë mundur të hapin rreth 30 metra rrugë, ndërsa gurët dhe dheun e nxjerrë prej andej e spostonin në anësore.
Hetuesit nuk përjashtojnë mundësinë që me autorët të ketë bashkëpunuar edhe ndonjë punonjës i bankës, por deri më tani nuk ka prova. Ndërkohë Policia dhe prokuroria e Tiranës kanë bindjen se personat që kanë hartuar planin për grabitjen janë profesionistë.
Në bazë të provave të mbledhura, grupi hetimor beson se grupi i autorëve përbëhej nga 5 deri në 7 persona.
Policia nuk ka ende asnjë emër të dyshuar autorësh, ndërsa janë në pritje të ekspertizës për gjurmët e gjetura në veglat e punës që autorët kishin lënë në tunelin e nëndheshëm.
/a.r
