Sekretari i Luftës në SHBA, Pete Hegseth planifikonte të shkonte në Bruksel muajin e kaluar për të dhënë atë që do të ishte një njoftim tronditës në një takim me shefat më të lartë ushtarakë të Organizatës së Traktatit të Atlantikut të Veriut.
SHBA-të, po përgatitnin shkurtime shtesë të forcave të tyre në Evropë që do të shkonin përtej vendosjes së anuluar të një brigade të blinduar në Poloni dhe tërheqjes së mëparshme të një brigade këmbësorie nga Rumania, citon burime të sajë, Wall Street Journal. Por propozimi i Hegseth u anulua pasi iu prezantua Marco Rubio-s – këshilltarit të sigurisë kombëtare të Presidentit Trump – dhe zyrtarëve të tjerë të lartë, thekson media amerikane.
Në vend të kësaj, Hegseth tha se SHBA-të do të kryejnë një rishikim të pozicionit të forcave të tyre në Evropë, që mund të zgjasë deri në gjashtë muaj. Kjo situatë sugjeron se administrata nuk është ende e vendosur për ritmin dhe fushëveprimin e shkurtimeve të mundshme në nivelet e trupave amerikane në Evropë. Ndërsa Trump ka folur për ndëshkimin e vendeve të NATO-s që ai mendon se nuk shpenzojnë mjaftueshëm për mbrojtjen e tyre ose që nuk e mbështetën luftën e SHBA-së me Iranin, propozimet dhe fjalimet e zjarrta të Hegseth kanë tronditur aleatët dhe ligjvënësit – përfshirë disa republikanë kryesorë – të cilët shqetësohen se ai do të shkaktojë dëme afatgjata në aleancë dhe do ta inkurajojë Rusinë.
Shtëpia e Bardhë ia referoi pyetjet Departamentit të Luftës. Sean Parnell, zëdhënësi kryesor i Pentagonit, tha: “Sekretari Hegseth siguroi që mesazhi i tij të ishte në përputhje me objektivat dhe axhendën e presidentit, dhe ai nuk donte të pengonte hapësirën e vendimmarrjes së presidentit.”
Nivelet e trupave amerikane dhe shpenzimet ushtarake të aleatëve pritet të jenë në fokus kur Trump të takohet me udhëheqësit e NATO-s në Ankara, Turqi, javën e ardhshme.
Zyrtarët e NATO-s shpresojnë që samiti i Ankarasë do të tregojë unitetin me SHBA-në dhe mbështetjen për Ukrainën në luftën e saj kundër Rusisë, por thonë se kanë frikë se tensionet me Trump mund ta errësojnë samitin. Zyrtarët e NATO-s po shqyrtojnë heqjen dorë nga planet për të mbajtur një samit vitin e ardhshëm në Shqipëri, thanë zyrtarët, një zhvillim i raportuar më parë nga Reuters.
Strategjia e mbrojtjes e Pentagonit e publikuar në janar sinjalizoi se SHBA-të do të zvogëlojnë praninë e tyre ushtarake në Evropë, ndërsa përqendrohen më shumë në Paqësorin perëndimor dhe Hemisferën Perëndimore. Qëllimi, sipas strategjisë, është t’u japë kombeve evropiane përgjegjësinë kryesore për mbrojtjen konvencionale të kontinentit.
