Një ngjarje e rëndë ka ndodhur në burgun e Vaqarrit gjatë orëve të pasdites të së shtunës. Një i burgosur raportohet të jetë plagosur me armë zjarri në ambjentet e brendshme të burgut. Bëhet fjalë për shtetasin kosovar Lili Dulaj i cili është transportuar në spitalin e traumës nga ku raportohet se është jashtë rrezikut për jetën.
Sipas informacioneve të policisë, bëhet me dije se ky person ndodhej në dhomën e ajrimit në momentin kur është goditur nga plumbi. Policia ka nisur veprimet për ngjarjen ndërkohë është rrethuar perimetri rreth burgut ku po ushtrohen kontrolle për autorin e krimit./a.m.
Njoftimi paraprak i policisë:
Njoftohemi nga Burgu i Vaqarrit se në ambjetet e ajrimit shtetasi Lili Dulaj, 40 vjeç, i cili është i paraburgosur në I.E.V.P. Vaqarr, dyshohet të jetë i plagosur me armë zjarri në këmbë nga një person i paidentifikuar në kohën kur ka qënë në ambjentet e ajrimit.
Forca të shumta policise kanë mbërritur në institucionin e vuajtjes së dënimit, ndërko që po krehin zonën nga ku dyshohet të jetë qëlluar i paraburgosuri. Shtetasi Lili Dulaj është transportuar në Spitalin Ushtarak ku ndodhet jashtë rrezikut për jetën.
Vijojnë hetimet për zbardhjen e plotë të rrethanave të ngjarjes dhe kapjen e autorit.