Policia e Elbasanit zbardh ngjarja e ndodhur mbrëmjen e djeshme në lagjen “11 Nëntori”, ku mbeti i plagosur me armë zjarri një person.
Nga ana e uniformave blu identifikohet dhe shpallet në kërkim autori i dyshuar i ngjarjes.
Pas ngjarjes ku mbeti i plagosur me armë zjarri Xhon Rusta, 22 vjeç, menjëherë janë organizuar shërbimet për zbardhjen e ngjarjes.
Si rezultat i hetimeve paraprake të kryera nga këqyrja e kamerave dhe informacionet e marra në rruge operative, rezultoi se ngjarja ka ndodhur te rruga e “Konvikteve” në lagjen “11 Nëntori”, ku autori i dyshuar është shtetasi J.S., i cili është shpallur në kërkim.
Po nga veprimet e kryera rezultoi se autori dhe i plagosuri udhëtonin veç e veç me automjete dhe si rezultat i një konflikti të çastit shtetasi J.S., ka qëlluar me armë zjarri pistoletë nga mjeti i tij në drejtim të mjetit të Rustës.
Në vendngjarje në cilësinë e provës materiale është sekuestruar një gëzhojë.
I plagosuri është jashtë rrezikut për jetën. Sakaq mësohet se Xhon Rusta, është person me precedentë penal në fushën e krimeve kundër personit dhe ka qenë i dënuar më për plagosje me armë zjarri.
Lidhur me këtë rast materialet iu referuan Prokurorisë së Elbasanit për veprime të mëtejshme për veprën penale “Vrasja me dashje, mbetur në tentativë“ si dhe “Prodhimi dhe mbajtja pa leje e armëve luftarake dhe e municionit”.
Aktualisht vijon puna për zbardhjen e plotë të rrethanave të ngjarjes, implikimit ose jo të personave të tjerë në këtë ngjarje si dhe për kapjen e arrestimin e autorit./a.m.
