Policia e Dibrës ka njoftuar se ka vënë në pranga katër persona në lidhje me ngjarjen e ndodhur ditën e djeshme në Dibër, ku u plagos rëndë Endri Sina.
Mësohet se në pranga janë vënë Pëllumb Sina, 62 vjeç, Renato Sina, 30 vjeç, djali i Pëllumb Sinës, (I dënuar më parë për veprën penale të Vjedhjes), Taulant Sina, 31 vjeç, Endri Sina 18 vjeç, vëllai i Taulantit, të gjithë banues në fshatin Rreth Kale, njësia administrative Muhurr-Dibër.
Ngjarja ndodhi ditën e djeshme ku rreth orës 11:00 në vendin e quajtur “Ura e Muhurrit”, njësia administrative Muhurr – Dibër, një punonjës policie me detyrë Specialist i Policisë së zonës ka dëgjuar të shtëna armësh.
Menjëherë ka kërkuar përforcime nga Komisariati i Policisë Dibër dhe ka lëvizur me shpejtësi në drejtim nga vinin të shtënat me armë zjarri, ku ka konstatuar se sapo kishte ndodhur një plagosje me armë zjarri.
Punonjësi i policisë ju ka bërë thirrje palëve të hedhin armët, është pozicionuar dhe ka pritur përforcime ku në kohë rekord kanë mbërritur forca të shumta policie të Drejtorisë dhe të Komisariatit të Policisë Dibër.
Në vendngjarje është konstatuar se ishte plagosur me armë zjarri shtetasi Endri Sina i cili u dërgua për ndihmë mjekësore më të specializuar në spitalin e traumës në Tiranë.
Autorët e dyshuar kanë tentuar t’ju largohen shërbimeve të policisë por falë veprimeve të shpejta të policisë janë arritur të kapen në kohë rekord shtetasit (babë e bir) Pëllumb dhe Renato Sina, që dyshohet se kanë plagosur me armë shtetasin Endri Sina.
Motivi i konfliktit dyshohet se është për një lavatriçe zhavorri në Lumin Drin, ku këta e kanë pasur të përbashkët duke e shfrytëzuar një vit njëra palë e një vit pala tjetër, ku babë e bir nuk kanë qenë dakord me marrëveshjen dhe kanë qëlluar me armë zjarri Pistoletë në drejtim të kushërinjve të tyre, shtetasve Endri dhe Taulant Sina (vëllezër), ku edhe këta u janë përgjigjur me armë zjarri automatik.
Si pasojë e të shtënave mbeti i plagosur rëndë s Endri Sina.
Në vendin e ngjarjes policia ka sekuestruar:
-një Automatik model 56, me një krëhër në trupin e tij me 26 copë fishekë.
-një Pistoletë TT model 54 , me një krëhër me 2-copë fishekë.
-tre gëzhoja model 56,
-tre gëzhoja model 54,
-një Predhë e shtypur
-tre shkopinj, dy druri dhe një shkop plastik.
-një automjet tip “Mercedz Benz”
Materialet hetimore në ngarkim të shtetasve të mësipërm i kaluan Prokurorisë Pranë Gjykatës Shkallës Parë për Krime të Rënda Tiranë, për veprime të mëtejshme.
