Policia e Tiranës referon në prokurori dosjen e plagosjes së gjyqtarit Artan Gjermeni, por nuk jep asnjë informacion për shumën e parave të sekuestruara në automjetin e tij, shkruan Balkanweb. “Në automjetin e tij me targa AA043FF, u gjetën dhe sekuestruan shumat e parave prej 18.760 eurosh dhe 285 mijë lekësh te reja”.
Dy ditë pas plagosjes së gjyqtarit Artan Gjermeni, policia referon në prokurori dosjen hetimore dhe sugjeron vijimin e hetimeve për akuzën e “plagosjes së lehtë me dashje”.
Sipas një deklarate zyrtare të policisë, mësohet se në automjetin e gjyqtarit të plagosur është sekuestruar edhe një shumë e konsiderueshme parash, burimi i të cilave nuk dihet ende.
Por në materialin zyrtar që policia e Tiranës i ka dërguar prokurorisë nuk jepet asnjë e dhënë për paratë e sekuestruara dhe asnjë referencë për hetime të mëtejshme ose jo.
Policia është mjaftuar me referimin e nenit 89 të Kodit Penal, pra për akuzën e “plagosjes së lehtë me dashje”.
Në këtë mënyrë rrëzohet alibia e gjyqtarit Artan Gjermeni se ai është plagosur aksidentalisht, por shtohen dyshimet për motivet e vërteta të ngjarjes.
Sipas burimeve mësohet se në hetim nuk janë përfshirë paratë e sekuestruara në automjetin me të cilin vetë Gjermeni u paraqit në spital për mjekim, edhe pse në dosje përshkruhet këqyrja e makinës dhe sekuestrimi i parave.
“Në automjetin e tij me targa AA043FF, u gjetën dhe sekuestruan shumat e parave prej 18 mijë e 760 eurosh dhe 285 mijë lekësh”, thotë policia.
Më tej, hetuesit përshkruajnë edhe dëmtimet që ka pësuar gjyqtari, si dhe pretendimet e tij se ngjarja ka qenë aksidentale.
BW
