Katër persona mbetën të plagosur pas një përleshjeje me armë zjarri që ndodhi të enjten rreth orës 13:40 në Podujevë, teksa policia e Kosovës ka reaguar sot zyrtarisht duke dhënë detaje për ngjarjen dhe kontrollet e kryera pas konfliktit.
Sipas Policisë së Kosovës, tre nga të plagosurit dyshohet se kanë qenë të përfshirë drejtpërdrejt në incident, ndërsa personi i katërt ishte një kalimtar i rastit që u godit gjatë ngjarjes. Të gjithë kanë marrë trajtim mjekësor.
Në vendin e ngjarjes, zyrtarët policorë sekuestruan tri armë zjarri dhe 28 gëzhoja. Megjithatë, bastisjet e zhvilluara më pas në pronat e të dyshuarve zbuluan një arsenal shtesë armësh dhe municioni.
Gjatë kontrollit u sekuestruan dy karikatorë me 58 fishekë, dy karikatorë të tjerë me 27 fishekë, dy armë të shkurtra të shoqëruara me 82 fishekë, si dhe një armë gjahu me 49 fishekë.
Rasti është iniciuar për veprat penale “Vrasje e rëndë në tentativë”, “Armëmbajtje pa leje” dhe “Asgjësim apo dëmtim i pasurisë”, ndërsa hetimet e Policisë së Kosovës janë në vazhdim për zbardhjen e plotë të rrethanave të ngjarjes.
