Një 31 vjeçar është dënuar me 6 vjet burg pasi plagosi me armë zjarri një shtetas rumun. Ngjarja ka ndodhur në Itali në 8 janar të 2013 dhe ndodhi pas një sherri në një lokal, që përfundoi në përdorimin e armës.
Sipas mediave italiane rumuni përfundoi në spital, ndërkohë që pas kësaj rezultoi se dosja e shqiptarit Emanuel Demaj ishte e mbushur me vepra penale.
Ai u etiketua jo vetëm për një seri aktesh kriminale, por edhe sepse në profilin e tij në Facebook kishte postuar foto me dy kallashnikovë në dorë.
Sipas mediave italiane, ndër të tjera ai rezultonte i arrestuar në Francë, pasi ishte në kërkim ndërkombëtar, ndërkohë që në makinë iu gjetën 2 kg flori dhe bizhuteri.
Në vitin 2011 ai ishte viktimë e një sulmi me armë, nga i cili mbeti i plagosur. Shqiptari sipas medias italiane akuzohet se ishte kreu i një bande grabitësish. Në vitin 2012 kjo bandë kreu së paku tre grabitje, të cilat janë të dokumentuara nga policia.
