Policia e Tiranës ka arrestuar tre të rinjtë, të cilët një natë më parë u konfliktuan me një 27-vjeçar, pasi ngacmuan të fejuarën e këtij të fundit. në pranga kanë rënë shtetasit Halit Ndreu, Ndriçim Shima dhe Fati Plangaj.
Të rinjtë akuzohen për plagosje të rëndë me dashje të kryer në bashkëpunim dhe prodhim e shitje të armëve të ftohta. Ngjarja ndodhi mbrëmjen e kaluar në zonën e Unazës së Re, ku tre të rinjtë ngacmuan të fejuarën e Altin M., 23-vjeçaren Klaudia K.
Ky ka qenë shkaku i sherrit mes të rinjve, që përfundoi me plagosjen e çiftit. Personat e arrestuar qëlluan me thikë dhe shkopinj çiftin e ri, ndërsa në polici shtetasi Halit Ndreu ka deklaruar se ka qenë i fiksuar pas 23-vjeçares.
Ndonëse e dinte që ishte e fejuar me dikë tjetër, ai vazhdonte ta ngacmonte vajzën, e cila nuk ka pranuar të lidhet me të. Kjo ka çuar në përleshjen mes të rinjve, që ka përfunduar me arrestimin e tre autorëve të ngjarjes.
a.ç
