Një shqiptar në Itali pati një konflikt të dhunshëm me të shoqen, të cilën e plagosi me thikë dhe u largua nga vendngjarja. Pak orë më pas, u gjet i vdekur nën një pemë pranë kishës San Liboria në Colorno.
Ngjarja e rëndë ndodhi në Parma dhe sipas autoriteteve italiane, ajo ka ndodhur mesnatën e së dielës duke gdhirë e hëna. Çifti kishte 22 vjet martesë. Ai 54 vjeç dhe ajo 45, patën një konflikt të dhunshëm mes tyre që degjeneroi me plagosjen e gruas në bark.
Gruaja u dërgua menjëherë në spital dhe tashmë është në kujdes intensiv, pavarësisht se në gjendje kritike për jetën. Gjatë gjithë natës policia, e lajmëruar nga djali i tyre, i cili sapo ishte kthyer në shtëpi, u përpoqën të gjenin agresorin i cili u arratis pasi kishte plagosur gruan.
Shqiptari u gjet në orën 6:00 të mëngjesit i pajetë, nga një vullnetar i cili kishte shkuar të dhuronte gjak pranë kishës. Ai vuri re trupin e vdekur nën një pemë në Severino, në frontin e kishës, dhe lajmëroi policinë.
Nga inspektimi i trupit rezultoi se nuk ka shenja të dhunës. Dyshimet shkojnë drejt një vetëvrasjeje, që ka ndodhur në dëshpërim e sipër pas plagosjes së bashkëshortes. Por 54-vjeçari dyshohet të ketë vuajtur nga një sëmundje. Gjyqtari ka urdhëruar një autopsi, e cila do të kryhet në ditët e ardhshme. Trupi u transportua në Institutin e Mjekësisë Ligjore.
SHEKULLI
