Policia në Kavajë ka përfunduar operacionin e koduar “Seven”, ku është kapur dhe arrestuar një shtetas i kërkuar ndërkombëtarisht.
Shtetasi Ervin Balliu, 43 vjeç, banues në fshatin Gosë, Rrogozhinë, ishte shpallur në kërkim nga autoritetet italiane pas një dënimi prej 7 vjetësh burgim nga Gjykata e Apelit të Torinos.
Ai ishte i përfshirë në një organizatë kriminale që merrej me trafikimin e lëndëve narkotike. Operacioni u realizua falë informacionit të siguruar nga inteligjenca policore, duke rezultuar në arrestimin e tij dhe nisjen e procedurave për ekstradimin në Itali.
“Kavajë/Finalizohet operacioni policor i koduar “Seven”, për kapjen e një shtetasi në kërkim ndërkombëtar.
I dënuar nga autoritetet italiane, me 7 vjet burgim, si pjesëtar i një organizate kriminale që trafikonte lëndë narkotike, kapet dhe arrestohet me qëllim ekstradimin, 43-vjeçari.
Si rezultat i kontrolleve të kryera bazuar në informacionet e siguruara nga inteligjenca policore, për vendndodhjen e një shtetasi në kërkim ndërkombëtar, Shërbimet Operacionale të Drejtorisë Vendore të Policisë Durrës dhe të Komisariatit të Policisë Kavajë kanë organizuar dhe finalizuar operacionin policor të koduar “Seven”.
Gjatë këtij operacioni, u kap dhe u arrestua me qëllim ekstradimin shtetasi Ervin Balliu, 43 vjeç, banues në fshatin Gosë, Rrogozhinë.
Ky shtetas ishte shpallur në kërkim ndërkombëtar pasi Gjykata e Apelit e Torinos, Itali, me vendimin e datës 06.06.2023, e ka dënuar me 7 vjet burgim, për veprat penale “Organizata kriminale” dhe “Trafikimi i narkotikëve”, sipas Kodit Penal të Italisë.
Interpol Tirana dhe Interpol Roma do të kryejnë procedurat për ekstradimin e këtij shtetasi, në Itali”, njofton policia.
