Drejtësia shqiptare vijon t’i rezistojë reformës në këtë sektor. Edhe pse ndërkombëtarët e kanë bërë të qartë se nuk ka asnjë kthim pas, një grup gjyqtarësh dhe politikanësh në vend janë bërë të gjithë bashkë kundër reformës në drejtësi, duke tentuar ta shtyjnë sa më shumë të jetë e mundur. Një ndër këto institucione është Këshilli i Lartë i Drejtësisë dhe kreu i saj Bujar Nishani. KLD bashkë me Unionin e Gjyqtarëve e kanë bërë të qartë se do e dërgojnë në Kushtetuese ligjin për statusin e gjyqtarëve dhe prokurorëve.
Por pse e kundërshton KLD këtë ligj? Ligji, i cili ka hyrë në fuqi javën që lamë pas, i heq të drejtën KLD dhe Bujar Nishanit për të emëruar gjyqtarë. Ata kanë të drejtë vetëm të komandojnë, por nuk bëjnë dot asnjë emërim. Kjo ishte arsyeja se përse pati valë emërimesh para hyrjes në fuqi të ligjit shkruan “sot”. Mirëpo tani Nishani dhe anëtarët e tjerë nuk janë pajtuar me përcaktimet në ligj dhe kanë nisur tentativat për ta shmangur.
Në mbledhjen e fundit të KLD, mësohet se është marrë vendimi për të ngritur një grup i cili do të merret me shqyrtimin e ligjit. Gert Hoxha, Brunila Kadi dhe Ridvan Hado janë mandatuar që të marrin dhe të studiojnë ligjin, për të gjetur ato nene që lënë vend për interpretim dhe KLD t’i përdorë për të vijuar me detyrën e saj. Edhe pse në mbledhje argumenti ka qenë se ky shqyrtim duhet të bëhet për të parë se si do vijojë puna e institucionit, mësohet se anëtarët po kërkojnë elemente të caktuara, në mënyrë që të shmangin ligjin.
Kushtetuta nuk e shkrin KLD dhe i jep asaj të drejta të plota, por ligji ja kufizon. Pikërisht këtu duan të ndërhyjnë dhe gjyqtarët dhe të gjejnë ato nene, ku në rast kundërshtish në emërime t’i përdorin si mburojë. Pasi të ketë mbarur shqyrtimi i ligjit, raporti do i dorëzohet Presidentit dhe do vendosë ai më pas se si do të procedohet. Nuk përjashtohet mundësia që në bazë të gjetjeve të ketë dhe ankimim në Gjykatën Kushtetuese.
Rrudhen kompetencat e Nishanit
Ligji për statusin e gjyqtarëve rrudh Këshillin e Lartë të Drejtësisë nga kompetencat. Në dy mbledhje të zhvilluara në një hark të shkurtër kohor, u pa se KLD bëri emërimin e rreth 20 gjyqtarëve. Arsyeja ishte se pas miratimit të ligjit për statusin e gjyqtarëve dhe prokurorëve, KLD nuk e ka më këtë kompetencë. Ligji përcakton se KLD mund të bëjë emërime të përkohshme gjyqtarësh në zonat ku është shumë e nevojshme, por nuk ka asnjë të drejtë që të emëroje kryetarë gjykatash.
“Këshilli i Lartë i Drejtësisë dhe Prokurori i Përgjithshëm mund të vendosin caktimin në pozicione të përkohshme të magjistratëve për të mundësuar ushtrimin e detyrave dhe funksionimin e institucioneve të drejtësisë. Deri në krijimin e Inspektorit të Lartë të Drejtësisë, Këshilli i Lartë i Drejtësisë dhe Prokurori i Përgjithshëm heton shkeljet disiplinore nëpërmjet inspektorëve të Këshillit të Lartë të Drejtësisë dhe Prokurorit të Përgjithshëm bazuar në procedurën dhe kriteret e Pjesa V dhe dispozitës kalimtare të këtij Ligji”, thuhet në ligj./a.k
