Ish-kryeministri italian, Silvio Berlusconi, shpallet nga autoritetit ukrainas si “persona non grata”. Liderit aktual i qendrës së djathtë italiane, i është ndaluar hyrja për tre vite në shtetin e Ukrainës.
Ky vendim është marrë nga Komiteti i Sigurisë Kombëtare të Kievit pas vizitës më 11 shtator në Krime të ish-kryeministrit italian nën shoqërinë e presidentit rus Vladimir Putin dhe pa pasur marrëveshje paraprake me autoritetet ukrainase.
Ministria e Punëve të Jashtme ukrainase ka dënuar publikisht vizitën e Silvio Berlusconit dhe Vladimr Putinit në Krime më 11-12 shtator 2015, duke e etiketuar si “një dhunim të normativës ukrainase mbi hyrjen në një territor të pushtuar përkohësisht.
Vizita në Krimenë e pushtuar është një tentativë e Federacionit rus për të legjitimuar me çdo kusht pushtimin e paligjshëm të Krimesë dhe një shprehje e mungesës së respektit për sovranitetin shtetëror të Ukrainës”.
Gjithashtu autoritetet ukrainase kanë kërkuar nisjen e një proçedimi penal për konsumimin e paligjshëm në Krime, nga Putin e Berlusconi, të një vere spanjolle e rrallë 240 vjeçare dhe mjaft e shtrenjtë, e cila e gjendur në territorin e Krimesë është nën mbrojtjen e autoriteteve ukrainase.
Vera e markës Massandra Sherry de la Frontera 1775 me një kosto prej 43500 dollarë qe vera më antike në Europë.
Gjatë vizitës në Krime, ish-Kryeminstri Berlusconi e Presidenti rus Putin bënë homazhe e vendosën lule në Memorialin e viktimave të luftës në Krime.
