Presidenti i së majtës në Parlamentin Evropian, Gianni Pittella, çeli turin e tij ballkanik nga Shqipëria, për të përcjellë nga një vend mik siç tha ai, mesazhin se Ballkani e ka vendin në Bashkimin Evropian, raporton shqiptarja.com.
Takimin e parë zyrtar Pittella e pati me kryetarin e Kuvendit të Shqipërisë Ilir Meta, jo vetëm për miqësinë me të por edhe për faktin se përfaqësojnë të njëjtën familje, “atë të krahut socialist”.
Shqipëria – theksoi Pittella – po ecën me hapat e duhur drejt procesit të integrimit në Bashkimin Evropian. Këtë konstatim ai e lidh me ecurinë në luftën kundër korrupsionit, reformën në drejtësi, progresin në administratën publike dhe respektimin e të drejtave të njeriut. Presidenti i së majtë në PE tha se beson që 2016-a do të jetë një vit i mbarë për vendin tonë në hapjen e negociatave për anëtarësim në familjen evropiane.
Pittella tha se mbështetja jo vetëm e tij por edhe e kolegut Knut Fleckenstein (raportuesit për Shqipërinë në PE) me të cilin ka nisur turin, është e rëndësishme për hapat e Shqipërisë në procesin e integrimit, por evidentoi se një peshë të madhe në këtë drejtim kanë edhe politikat e ndërmarra nga aleatët lider në qeverisje Ilir Meta dhe kryeministri Edi Rama.
“Ne jemi këtu për të filluar një mision që do të vijojmë edhe në vende të tjera, bashkë me kolegët Knut Fleckenstein dhe do donim ta nisnim nga Shqipëria për shkak të lidhjes së fortë që na lidh me këtë komb. Dhe donim ta nisim me kryetarin e Kuvendit Ilir Meta për miqësinë dhe bashkimit të familjes politike që i përkasim krahut socialist. E gjithë kjo për të ripërsëritur dëshirën tonë për të çuar vendet e Ballkanit drejt Bashkimin Evropian. Shqipëria po ecën shumë mirë, dhe vlerësoj qeverinë Rama për punën që ka bërë, hapat me rëndësi që ka marrë në arritjen e këtij procesi. Po bëhet një luftë në nivel më të lartë ndaj korrupsionit, ka progres të administratës publike, ka një avancim domethënës në respekt të të drejtave njerëzore, ka një rritje ekonomike që do të sjellë rritjen ekonomike me 3 %. Po bëhen hapa të rëndësishëm për reformën në drejtësi, në mënyrë që në vitin 2016 të ketë formalizimin e statusit për hapjen e negociatave të Shqipërisë. Ky është procesi të cilin ne po e ndjekim, nuk jemi këtu për herë të parë, e keni ndjekur Shqipërinë edhe në procesin e liberalizimit të vizave. Është e rëndësishëm që Shqipëria të ketë miq si ne, por është e rëndësishme që ka edhe lider si Meta e Rama që të arrijnë të konkretizojë këtë ndërmarrje”, tha Pittella ne nje deklarate per mediat pas takimit qe mbajti me kryeparlamentarin Meta.
Pas takimeve me zyrtarë në Tiranë, Pittella vijon turin në Maqedoni dhe në Serbi. Kjo vizitë e ndarë në dy pjesë e cila nis në Shqipëri lidhet me ecurinë e reformave të cilat do të çojnë vendin drejt hapjes së negociatave për ne Bashkimin Evropian me kushtin që këto vende të jenë në përputhje me kriteret e parashikuara për anëtarësimin në Union.
Europarlamentari italian shumë herë është shprehur publikisht në favor të pranimit të Shqipërisë në BE.
Shqiptarja.com
