Piloti italian Giorgio Rifformato ka vizituar plazhin e Divjakës së bashku me Saimir Bajramin para rrëzimit të avionit. Këtë fakt e ka pohuar para gjykatës dëshmitari Dardan Ahmetaj i cili i ka shërbyer si shoferi Rifformatos gjatë 3 ditëve të qëndrimit të tij në vendin tonë.
“Më telefonoi një shok i imi, i cili është kushëri me Saimir Bajramin, më kërkoi që të shkoja në Rinas për të marrë një person.
U nisa nga Lushnja dhe në Rinas takova Saimirin, të cilin në aeroport e mora së bashku me italianin.
Emrin e Rifformatos e kam mësuar ditën që ra avioni, pasi ditët që i kam shërbyer si taksi dhe e mora në Rinas, Saimir Bajrami ma prezantoi me emrin Eli.
Pasi i mora në Rinas i dërgova në Divjakë ku për 10 minuta Rifformato së bashku me Bajramin bënë një vizitë në rërën e plazhit të Divjakës.
Më pas u kthyem në Tiranë dhe e shoqërova deri tek hoteli pranë prokurorisë ku për dhomën e tij pagova 50 euro.
Të nesërmen e dërgova në Durrës tek shtëpia e Saimirit, dhe për herë të fundit e kam takuar mëngjesin e 10 Majit kur e çova në Rinas”, – mësohet të ketë thënë dëshmitari para trupit gjykues, sipas Report tv.
Giorgo Rifformato ka mohuar akuzën e përfshirjes në trafik droge, teksa i mëshon qëndrimit të tij se avioni u rrëzua nga një turbulencë ajrore.
