Pikat e karburanteve kanë rënë pre e grabitjeve muajt e fundit. Me një pistoletë ose me një kallashnikov janë të rinj kryesisht të cilët shkojnë për të grabitur shuma të konsiderueshme parash.
Në muajt e fundit janë të shumta rastet e grabitjeve, të gjitha të ndodhura gjatë natës. Rasti më i bujshëm ishte Geraldo Kuci, 21 vjeç, punonjës i Gardës së Republikës.
Sipas Policisë së Tiranës Geraldo Guci ka vjedhur 4 karburante duke përdorur pistoletën e punës. Ai e linte makinën në një distancë të konsiderueshme, kontrollonte territorin dhe më pas kryente grabitjen, duke trembur punonjësit e karburantit. Ai ka vjedhur dy karburante në selitë, një në rrugën “Teodor Keko” dhe një tjetër në rrugën “Myslim Shyri”.
Një tjetër rast grabitje tronditi Sarandën në datën 6 nëntor. Arqile Koci, 27 vjeç, vrau me çifte punonjësit e karburantit Artan Hoxha dhe vodhi 60 mijë lekë të reja. Ai u arrestua vetëm disa orë më pas.
Disa raste grabitje janë bërë edhe në rrugën Lezhë-Shkodër, ku më i fundit u krye në datën 27 nëntor. Kanë qenë dy persona të cilët dhunuan rojën dhe punonjësit dhe më pas morën 100 mijë lekë të reja dhe 200 euro. Edhe në këtë rast autorët përdorën një kallashnikov dhe përfituan nga errësira për tu larguar me shpejtësi. Edhe gjatë natës së sotme një karburant u vodh në Urën e Dajlanit në Durrës.
Në 5 muajt e fundit numërohen më shumë se 10 grabitje karburantesh dhe të gjitha të kryera gjatë natës. Por si mund të shmangen grabitjet e karburanteve natën. Ministri i brendshëm Saimir Tahiri ka propozuar vendosjen e automateve gjatë natës, në mënyrë që shoferët të vetshërbehen.
Sinkron
Gjatë 5 viteve të fundit janë rreth 175 pika karburantesh të grabitura, ndërkohë që Policia ka arritur të zbardhë vetëm 40% të këtyre ngjarjeve.
shqiptarja.com/d.i.
