Pianisti i cili interpretoi këngën “Imagine” të John Lennonit në një piano jashtë teatrit Bataclan për nder të viktimave, ka bërë një udhëtim prej 643 kilometrave për të nderuar viktimat e Parisit. Davide Martello në një intervistë për The Guardian ka thënë se ishte në një bar në Konstanz të Gjermanisë, kur sulmet filluan, ndërsa brenda minutave kishte vendosur që të udhëtonte për Paris, transmeton Koha.net.
Ai vendosi pianon e tij në një rimorkio për të filluar udhëtimin e tij prej 643 kilometrave për të arritur në Paris. “I telefonova një mikut tim për këtë, mora makinën dhe vozita gjatë gjithë natës. E dija se duhet të bëja diçka. Doja të isha aty dhe të provoj të jepja një shenjë shprese dhe të shprehja ngushëllimet e mija. Nuk mund të sjell njerëzit përsëri në jetë, por mund të inspirojë ata përmes muzikës, dhe kur njerëzit janë të inspiruar mund të bëjnë çdo gjë. Kjo ishte arsyeja pse unë interpretova Imagine”. Martello ishte i shokuar me pamjet që kishte parë, kurse performancën e tij ka thënë se ishte shumë emocionale.
