Policia e Shtetit ka sqaruar opinionin publik në lidhje me motivacionin e pezullimit nga detyra të Shefit të Komisariatit të Kavajës. Në njoftimin e saj, Policia thekson se Komisar Arbëresh Vokshi, me detyrë Shef i Komisariatit të Policisë Kavajë, ka kryer “Shkelje ose mosushtrimi i kompetencave të policisë”, “Përdorimi i detyrës si punonjës Policie për interesa private”.
Më konkretisht, Vokshi ka penguar kryerjen e veprimeve hetimore për veprën penale të “Ndërtimit të Paligjshëm”.
Këtë çështje siç thekson policia, SHÇBA-ja e ka në hetim, bazuar në ankesën e një pronari të ndërtimi të paligjshem, ku pretendohet se punonjësi i policisë Komisar Arbëresh Vokshi i ka marrë 2000 Euro në favorizim të ndërtimit të paligjshëm të një banese.
Gjithashtu, ai nuk ka dhënë informacion në lidhje me kultivimin e bimëve narkotike në fshatin Zambishë dhe fshatin Çekë të Rrogozhines, ku me datën 21.08.2015 janë zbuluar e asgjësuar bimë narkotike të llojit “Cannabis Sattiva”, në total rezultuan të ishin 7090 bimë narkotike të llojit “Cannabis Sattiva”, si dhe 12 thasë të mbushur me 100 kg “mariuanë” e presuar.
Bazuar mbi këto shkelje të përsëritura gjatë ushtrimit të detyrës nga ana e Shefit të Komisariatit, pas hetimit disiplinor të kryer nga ana e Drejtorisë së Standarteve Profesionale ne Drejtorine e Policise se Shtetit, Drejtori i Policisë së Shtetit, me vendimi te datës 19.08.2015 ka bërë pezullimin paraprak nga detyra të këtij punonjësi policie për ti hapur rrugë një hetimi sa më të plotë e të paanshëm ndaj këtij punonjësi policie.
