Ministri Edmond Panariti urdhëron pezullimin e aktiviteteve të peshkimit në zonën e ndotur deri në përfundimin e analizave laboratorike.
Ministri Panariti jep gjithashtu urdhër Autoritetit të Ushqimit për marrjen e mostrave të peshqve dhe molusqeve nga zona e ndotur.
Vendimi i Ministrit të Bujqësisë dhe Zhvillimit Rural vjen pas ndotjes së ndodhur në zonën bregdetit të Adriatikut në Durrës, e më konkretisht në afërsi të plazhit “Iliria”. Mësohet se është konstatuar se ndotjet kanë arritur deri në brezin e parë të rërës, të transportuara nga dallgët.
Lidhur me ngjarjen më herët ka reaguar Ministri i Mjedisit, Lefter Koka, teksa Policia ka lajmëruar nisjen e hetimeve.
Siç mësohet nga njoftimi i Policisë së Durrësit, menjëherë për këtë ngjarje është ngritur grupi i posaçëm hetimor. Ekspertët e laboratorit Kriminalistik në bashkëpunim me inspektorët e mjedisit do të marrin mostra për ekspertim. Do te verifikohen të gjitha anijet në Radën e Portit te Durrësit dhe çdo mjet lundrues që ka lëvizur në hapësirën detare të ndotur, përgjatë 24 orëve të fundit. Mjetet e policisë kufitare Durrës kanë dalë në det në patrullim për të verifikuar të gjitha lëvizjet në ujërat territoriale tona. Lajmërimi për ndotjet është bërë rreth orës 10:00 të mëngjesit, kur është lajmëruar dhe policia.
