Presidenti i Republikës së Kosovës, Hashim Thaçi shprehu të shtunën nga Tirana gatishmërinë për vijimin e bisedimeve për një marrëveshje gjithëpërfshirëse me Serbinë, me ndërmjetësimin e Shteteve të Bashkuara të Amerikës dhe Bashkimit Europian.
I pranishëm në Samitin për Paqen në Europën Juglindore, presidenti kosovar shprehu njëkohësisht edhe zhgënjimin për kohën e gjatë të pritjes për integrimin në BE kur kanë kaluar 20 vite që prej krijimit të Kosovës shtet i pavarur. Por siç u shpreh ai, nuk duam dhe nuk kemi fat tjetër politik e historik, përveçse atij të integrimit në BE.
“Kosova u bë shtet në shkurtin e vitit 2008 dhe së bashku me njohjet e para erdhi mesazhi për perspektivën europiane për shtetin më të ri në rajon e botë. Paqja para 20 viteve solli entuziazëm për të gjithë ne. Nuk besoj se ka patur politikan a qytetarë të Kosovës, që ka mundur që të mendojë se 20 vite më pas, Kosova nuk do të ishte pjesë e BE. Kush do të besonte se marrëdhëniet mes vendeve nuk do të ishin sipas shembullit të Francës e Gjermanisë në 20 vitet e para. 20 vite më pas, ende nuk kemi një marrëveshje me Serbinë. Janë humbur raste të mëdha, ndërsa ne kemi qenë të gatshëm të shtrijmë dorën për të arritur këtë marrëveshje”, deklaroi presidenti i Kosovës.
Thaçi vuri në dukje po ashtu, se paqja do të vij nga një marrëveshje gjithëpërfshirëse, e cila nuk ka si të mos përfundojë pa njohjen reciproke, si dy shtete të pavarura e sovrane.
Presidenti i Kosovës foli edhe për ngecjen e procesit të liberalizmit të vizave .
“ Jemi të vet dijshëm për dyshimet e ngecjet e Brukselit karshi shteteve të Ballkanit Perëndimor dhe ne në Kosovë po paguajmë çmimin e rëndë për liberalizimin e vizave. Na është bërë e padrejtë, ashtu siç edhe iu bë e padrejtë Shqipërisë dhe Maqedonisë së Veriut. Por e gjithë kjo situate për ne në Kosovë, nuk shkakton konfuzion se ç’duhet të bëjmë e si do të sillemi më tej, në raport me BE-në”, deklaroi presidenti i Kosovës.
Ne duam dhe nuk kemi fat tjetër politik e historik , vijoi fjalën Presidenti Thaçi.”Ne nuk duam fat tjetër dhe i kthehem bindjes sime të thellë se do të ishte mirë që të gjitha shtetet e Ballkanit Perëndimor të integroheshim së bashku në BE”, u shpreh ai më tej.
