Me moton “Përkujtojmë dhe festojmë së bashku“, Festa e Pezës rikthehet në këtë 73-vjetor të çlirimit, ku përgjatë 3 ditëve, (14-16 shtator 2015) në parkun e Pezës do të zhvillohet edhe aktiviteti rinor “Peza n’fest”.
“Peza n’fest” 2015, që do të nisë mbrëmjen e 14 shtatorit ora 20:00, do të ofrojë për publikun 3 ditë festive, ku përveç muzikës live që do të intepretohet nga grupet, artistët, dhe dee-jay të njohur, ditët do të shoqërohen me mjaft aktivitete të tjera si panaire kulinarie, lojra për fëmijë, shfaqje cirku, këngë partizane, dhe ekspozita fotografie.
Peza është stolisur si kurrë më parë për të pritur mijëra vetë, që do të ndjekin edhe koncertin e madh që do të zhvillohet në Parkun e Pezës me pjesëmarrjen e Fanfara Tirana dhe Robert Bisha, Special Guest – Dudu Morandi (Modena City Ramblers), Gipsy Groove dhe Dj Jehonë.
“Peza n’fest” zhvillohet në kuadrin e Konferencës së Pezës, mbajtur në 16 shtator të viti 1942, e cila pati për qëllim organizimin e forcave të ndryshme politike në një luftë të përbashkët kundër Italisë fashiste.
Në përkujtim të Konferencës së Pezës dhe në nderim të kontributit të atyre që luftuan për lirinë e vendit do të organizohen edhe ekspozita të ndryshme me disa nga punimet më të mira vendase.
