Petrit Vasili është përpjekur të marrë në mbrojtje kryetarin e partisë së vet Ilir Meta(j), për çështjen e mbiemrit të tij.
Kjo, duke qenë se zyrtarisht ai është Ilir Metaj, por për vite të tëra ka firmosur si Ilir Meta.
Vasili solli si shembull Edi Ramën, që e ka pasur emrin Edvin.
“Kemi dekrete për emërimin e ish-ministrit të Kulturës, Edi Rama dhe të emërimit dhe zgjedhur si kryetar bashkie, ndërkohë që në 2002, Edi Rama ka ndërruar emrin nga Edvin Kristaq Rama në Edi Rama.
I vetmi njeri që kemi në nivelet më të larta të politikës që kemi problem shumë të madh formal dhe ligjor, sepse është edhe objekt i legjislacionit të përvetësimit të postit shtetëror përmes mashtrimit me gjeneralitet. Është rasti më tipik, që kemi Edi Ramën dhe i provuar e zeza mbi të bardhë.
Një njeri me një identitet krejt tjetër ka mbajtur poste shumë të rëndësishme. Këtu duhet kërkuar ky problem”, deklaroi Vasili.
Sipas denoncimit të Petrit Vasilit, personi në objekt hetimi për përvetësimin e postit shtetëror dënohet sipas nenit 246 të Kodit Penal.
“Përvetësimi i një titulli apo detyre shtetërore i shoqëruar me kryerjen e veprimeve që i takojnë mbajtësit të titullit apo të detyrës, përbën kundërvajtje penale dhë dënohet me gjobë ose me burgim gjer në dy vjet.
Kur vepra kryhet me qëllim fitimi apo ka prekur lirinë, dinjitetin apo të drejta të tjera themelore të shtetasit, dënohet me gjobë ose me burgim gjer në pesë vjet”, thotë ky nen.
Edi Rama natyrisht nuk ka lidhje në këtë histori, pasi zyrtarisht njihet me këtë emër dhe me këtë emër ka firmosur në çdo post shtetëror që ka qenë.
Ndërsa me Ilir Metën është ndryshe muhabeti.
Ai zyrtarisht është Ilir Metaj, por ka firmosur si Ilir Meta.
Pra Petrit Vasili, në “vend të vinte vetullat, i nxorri sytë Ilir Metës”.
Tani mund të thonë që një shkronjë nuk bën ndonjë diferencë të madhe, por ndër vite kemi parë denoncime të shumta në “Fiks Fare” apo emisione të ndryshme investigative, se si qytetarët janë marrë më qafë nëpër zyrat e shtetit pikërisht vetëm për një shkronjë.
Ndaj dhe nëse merret seriozisht kjo çështje, Ilir Meta mund të përballet me nenin 246, edhe pse kjo është akuza më e lehtë për të, pot ë marrësh parasysh biografinë e tij në këto 30 vite.
(TemA)
