Ka nisur ditën e sotme mbledhja e firmave në qytetin e Tiranës për Reformën në Drejtës. Peticioni në fjalë ka si qëllim votimin e organeve të Vettingut dhe vijimin e Reformës.
Kryebashkiaku Erion Veliaj tha sot se një minorancë e zhurmshme në një çadër nuk mundohet t’i imponohet një shumice të heshtur.
“I falenderoj qytetarët dhe jam i bindur se ditët në vijim do të kemi 1 milion firma për Vettingun, 1 milion firma për Tiranën. Duket sikur ambasadorët e duan Shqipërinë më shumë se ne, por duhet që shqiptarët ta duan më shumë vendin e tyre” – tha Veliaj.
Sipas kreut të Bashkisë Tiranë punët e kryeqytetit janë bllokuar ndër vite për shkak të gjykatave të korruptuara. Ai tha se nuk mund të vijohet më me gjykata që japin drejtësi sikur të jenë në një ankand.
Thirrje për t’iu bashkuar peticionit ka bërë edhe aktori Gazmend Paja i cili tha se kjo nismë është për të mirën e të gjithëve.
Në pikat kyçe të Tiranës shoqëria civile ka ngritur sot disa çadra për të mbledhur firmat që kërkojnë kthimin e opozitës në Kuvend./javanews/b.d
