Një peticion drejtuar Federatës Italiane të Futbollit (FIGC) dhe Komitetit Olimpik Italian (CONI) kërkon rikthimin e mburojës historike si stemë mbi fanellën e kombëtares.
Peticioni i hedhur në Change.org ka grumbulluar tashmë rreth një mijë firma. Në futboll traditat kanë rëndësi, shprehen firmëtarët e peticionit, të cilët u bëjnë thirrje drejtuesve sportivë të respektojnë simbolet e një trashëgimie vlerash e idealesh që është kombëtarja italiane.
Stema klasike në formë mburoje tringjyrëshe me fjalën Italia e ka fillimin pas luftës së dytë botërore, kur dizenjoja e thjeshtë shoqëronte sportistët e kaltër të çdo sporti. Ajo qëndroi deri më 1982, kur, pas fitores së botërorit spanjoll, u hoq nga fanella e kombëtares. U rikthyer për pak kohë nga 1999 deri më 2005, vit kur u hoq përfundimisht, për t’u zëvendësuar nga një tjetër logo e federatës.
4 yjet — “Të gjitha kombëtaret e mëdha të botës, si Anglia, Gjermania, Brazili apo Argjentina, mbajnë logot historike mbi fanella, pa ndryshime ekstravagante të dizenjos. Dhe po me aq krenari shfaqin yjet që përfaqësojnë botërorët e fituar, krejtësisht të dukshëm mbi stemë”, lexohet në Change.org.
Firmëtarët kërkojnë që katër yjet e botërorëve të Italisë, të vendosur brenda stemës, të vendosen jashtë saj.
GDS/d.i.
