Kremlini ka paralajmëruar se do t’i drejtojë armët bërthamore ruse drejt Lituanisë nëse vendi baltik, anëtar i NATO-s dhe fqinj i Rusisë, instalon koka bërthamore nga arsenalet e aleatëve të saj në territorin e saj.
“Nëse armët bërthamore vendosen në territorin (lituanez) dhe drejtohen kundër nesh, atëherë, në përputhje me rrethanat, territori i këtij vendi do të jetë në shënjestër të armëve tona bërthamore”, tha zëdhënësi i Kremlinit, Dmitry Peskov.
Mbërritja e armëve bërthamore në Lituani do të ishte “një pikë kthese shumë serioze në aspektin e përshkallëzimit të tensioneve”, shtoi ai në një intervistë me televizionin shtetëror rus të publikuar sot.
Lituania po lëviz për të hequr një ndalim kushtetues për ruajtjen e armëve bërthamore në territorin e saj, në një veprim që ajo thotë se synon të rrisë sigurinë e saj pas pushtimit të Ukrainës nga Rusia .
Ky propozim për rishikim kushtetues po shqyrtohet aktualisht nga Parlamenti Lituanez . Për miratim kërkohet një shumicë prej dy të tretash dhe propozimi ka mbështetjen e presidentit, si dhe të partive kryesore politike, dhe mund të hyjë në fuqi këtë dimër.
Në fillim të korrikut, Presidenti lituanez Gitanas Nausëda deklaroi dëshirën e vendit të tij për të marrë pjesë në parandalimin bërthamor të Perëndimit kundër Moskës, duke lënë të kuptohet vendosjen e armëve bërthamore në territorin e vendit baltik.
Megjithatë, zyrtarët lituanezë kanë deklaruar vazhdimisht se nuk ka plane për të strehuar armë të tilla në territorin e vendit.
