Mërgim Mavraj, mbrojtësi i Kombëtares, ka fajësuar Lorik Canën për pësimin e golit të dytë në ndeshjen miqësore ndaj Austrisë
Kombëtarja shqiptare ka pësuar dy gola të shpejtë nga Austria, në ndeshjen miqësore që përfundoi 2:1 për vendasit.
Për mbrojtësin e Kombëtares, Mërgim Mavrajn momenti i pësimit të golave ka qenë një keqkuptim mes lojtarëve të prapavijës.
“Pësimi i golit të parë në atë mënyrë është diçka që ndodh edhe te skuadrat më të mira. Kemi bërë mirë edhe gjatë fraksionit të parë të lojës, mirëpo nuk patëm cilësi në zonë”, ka deklaruar ai.
Kurse, për golin e dytë mbrojtësi kosovar fajëson kapitenin e skuadrës, Lorik Canën.
“Në momentin e golit të dytë, unë e zotërova situatën. Por, Loriku më tha: ‘Je vetëm. Lëre topin’ dhe unë ashtu veprova, pasi nuk kisha çfarë të bëja tjetër”, deklaron mbrojtësi i Kolnit.
Sipas Mavrajt, në pjesën e dytë të lojës ka qenë një tjetër paraqitje dhe skuadra ka bërë një ndeshje pozitive.
“Pjesa e dytë ishte shumë, shumë e mirë nga ana jonë, pavarësisht se nuk barazuam dot”, është shprehur futbollisti i Kombëtares për “Panorama Sport”.
